TCPS butangan og CCTV, mga kapitan buot makigkita sa hepe

CEBU, Philippines — Gitinguha karon sa bag-ong hepe sa kapolisan sa siyudad sa Talisay nga magbutang og closed circuit television (CCTV) diha sa ilang buhatan.

 Kini human nakita ni Superintendent Jason Villamater nga delikado sa pagpang-atake ang ilang buhatan tungod kay abli kaayo kini sa bisan kinsa nga tawo. Ang Talisay City Police Station nahimutang kini diha sa Barangay Poblacion ug walay koral ang palibot niini tungod kay atbang kini sa parke sa siyudad.

 Matud ni Villamater nga nabag-ohan siya sa iyang pag-abot nga walay CCTV ang buhatan sa kapolisan tungod kay sa uban niyang mga lugar nga gigikanan kompleto ang ilang CCTV nga mohatag kanila og seguridad.

Si Villamater mimando na kini sa iyang sakop sa pagpangita og CCTV aron matauran na ang ilang buhatan.

Sa laing bahin, gipaabot sa mga barangay kapitan sa 22 ka barangay sa siyudad ang ilang bag-ong hepe nga mohatag o mopresentar sa iyang mga plano alang sa kaayohan sa siyudad.

Si Kapitan Raul Cabañero sa Barangay Bulacao nibutyag nga bukas ang ilang mga kamot alang kang Villamater ug ilang gipaabot ang mga plano niini.

Si Villamater nagplano na kini sa pagpakigkita sa mga kapitan aron buhion pagbalik ang Barangay Anti-Drug Abuse Council (BADAC).

Matud ni Cabañero nga aktibo ang BADAC alang ngadto sa mga surrenderer apan giangkon niya nga adunay mga opisyales sa barangay nga maayo lang sa meeting ug mopresentar sa ilang mga dokumento alang sa ilang pagtuman sa kamanduan apan diay compliance lang kini. (BANAT NEWS)