Follow-up bantayan sa spot report

CEBU, Philippines — Gipasabot ni Police Regional Office-7 Director, Chief Supt. Jose Mario Espino, nga adunay mga follow-up operation unta ang kapolisan nga mabutyag na hinoon sa mga sakop sa media gikan sa spot report.

Tungod niini, matud ni Espino nga nakabalda kini sa operasyon sa kapolisan.

Nasayran nga gimando sa Camp Crame nga did-an na ang media nga makabasa sa spot report o journal sa kapolisan nga kuhaan sa detalye sa balita ug magpaabot na lang sa mga press release apan gisupak kini sa mga sakop sa media sa Sugbo.

Apan sa iyang bahin, ang hepe sa Ozamiz City nga si Chief Insp. Jovie Espenido niingon nga mahimo ra gihapong makatan-aw ang media sa ilang mga spot reports.

“Di na lang gani nako pakopyahon. Tagai og copy ang media. Photocopy kay kapoyan ang media sige’g suwat-suwat. Unsa may naa ana? Kailangan gyud mo makahibalo para mapahibalo ninyo sa uban,” matud ni Espenido atol sa iyang pagtambong sa tigum sa Sugbo sa mga opisyal sa barangay gikan sa Mindanao. (BANAT NEWS)