Banat ( Leaderboard Top ), pagematch: 1, sectionmatch: 1

Dalaw sa CPDRC gibalik na

CEBU, Philippines — Nagmaya ang mga piniriso sa Cebu Provincial Detention and Rehabilitation Center sa pagbalik na sa dalaw sa ilang mga minahal sa kinabuhi.

Matud sa tinubdan nga liboan sab ka sakop sa ilang pamilya ang nangalipay sa maong kalambuan ug mapasalamaton sila kang Gobernador Hilario Davide III ug Bise Gobernador Agnes Magpale.

“Dili masulod sa kasingkasing ni Nestor Catipay nga maoy busyo diri sa sulod ang iyang kalipay. Apan gatubig among mga mata tungod kay aduna tay gobernador nga mipangga ug mihatag og laing higayon kanamo,” matud sa tinubdan.

Maoy giampo sa mga piniriso atol sa ilang pagsaulog sa piyesta sa Birhen sa Fatima niadtong Biyernes, Septiyembre 8, nga mabalik na ang dalaw sa ilang pamilya dungan ang pasalig nga andam sila mokooperar sa kadagkuan sa CPDRC.

Ang pagsaulog sa kapistahan paningkamot sa mga piniriso ingon man ang pagpintal sa sulod nga bahin sa bilanggoan ug pagpaayo sa kapilya nga walay ayuda gikan sa kagamhanan aron pagpakita sa ilang kamatinud-anon.

“Gob, salamat nga wala nimo kalimti kay hangtud karon presko pa kaayo sa akong dughan ang inyong panaghigalaay sa akong amahan. Ang tinuod nakahilak ko sa kalipay para sa tanan piniriso kay igway sapayan ko ni akong kaugalingon ilis sa nakita nako ang paghangop nila sa ila pamilya kay ako pwede nga mag-inusara,” matud sa laing piniriso nga dili magpaila.

Iya sab gipasalamatan si kanhi bokal Grecilda Sanchez-Zaballero nga nahimo nilang taytayan ngadto sa Kapitolyo.

Niadtong Agosto gisuspenso ang dalaw sa CPDRC human ubay-ubay nga mga shabu ug kontrabando ang nakuha atol sa ronda.

 “There’s no reason to continue the suspension,” matud sa officer-in-charge sa CPDRC nga si Bobby Legaspi.

Matud ni Legaspi nga hugot nilang ipatuman ang seguridad ilabi na sa pagsusi sa mga dad-ong butang sa mga dalaw.

Apil sa bantayan ang lihok sa mga sakop sa Provincial Public Safety Company (PPSC) nga nitabang pagbantay sa CPDRC, mga empleyado ug mga guwardiya.

Samtang napulo ka personnel sa CPDRC ang hayan masuspenso nunot sa kontrobersiya sulod sa prisohan.  Hinoon wala pa gibutyag kung kinsa ang maong mga personnel. (BANAT NEWS)

  • Follow Us: