Kagubot sa merkado sa Minglanilla

CEBU, Philippines — Miulbo na usab ang kagubot sa merkado publiko sa Minglanilla dihang usa ka tindera og mga utanon ang namasangil sa kolektor sa munisipyo nga nanapog kaniya niadtong Domingo.

Si Luzminda Uba, 57, ni-post sa Facebook nga siya nagpa-blotter tungod sa nahitabo kaniya. Matud pa nagbasa lang siya sa balita sa pamantalaan bahin   sa mga opisyales sa munisipyo nga gipangtaktak.

Sumala pa ni Uba, usa ka Bella Auman ang nakadungog sa iyang pagbasa sa maong balita ug misumbong ngadto ni Arlee Selma ang market collector sa lungsod.

Matud pa niya nga gipatawag siya sa buhatan ni Selma ug didto gitulisok ug gidapog ang iyang tuo nga bukton. Dali siya nga nigawas ug naghilak dayun gihat-an pa og sukmag sa usa ka Roel Tecson.

Sumala pa nga nagsugod ang bikil dihang adunay trak sa basura nga moparking sa atubangan sa pwesto ni Auman, apan iyaha kining gibadlong. Matud pa nagkatinubagay si Auman ug Uba.

Si Auman mipasangil kang Uba nga namulong kini kanila nga dili angay tuohan ang mga taga munisipyo kay mga kawatan.

Si Selma sa iyang bahin miklaro nga iya rang gipatawag si Uba sa iyang buhatan aron sila mahusay.

Apan nahibulong na lang siya nga nanabi si Uba nga siya gidapog. “Kung ako pa siya’ng gikulata dili kaha siya mabaliwliw kadako nako,” asoy pa ni Selma.

Samtang si Tecson sa iyang bahin miingon nga iya rang gibadlong si Uba tungod kay nagsiyagit-siyagit kini sa gawas nga siya gitabangan og kulata bisan di tinuod.

Matud ni Tecson adunay mga kritiko sa administrasyon diha sa merkado nga misakay   dayon.

Si Concordio Mejias, municipal administrator nitug-an sa mga tigbalita nga maghimo sila og imbestigasyon sa maong hitabo. Si Selma ig-agaw ni Bise Mayor Robert John Selma.

Si PO3 Gilmer Noval sa Minglanilla Police Station miingon nga iyang gipakurasyonan si Uba ug iyang gi-refer ang panghitabo ngadto sa barangay level. (BANAT NEWS)