CHR nakakuha’g suporta sa mga opisyal

CEBU, Philippines — Pipila ka mga opisyal sa Sugbo ang mipadayag sa ilang managlahing opinyon kalabot sa gihimo sa House of Representatives paghatag sa Commission on Human Rights og P1,000 nga budget alang sunod tuig.

Ang director sa CHR-7, Atty. Arvin Odron miingon nga daghan ang wala malipay sa gihimo sa Ubos Balay Balauranan apan malaumon siya nga mausab kini sa bicameral committee ini og tipuon na ang mga bersyon sa balaudnon apil na ang sa Senado.

Diha sa maong budget kuhaon ang sweldo sa ilang mga sakop ug sa operasyon sa ahensya. Ang CHR usa ka constitutional body nga gitahasan pagprotektar sa katawhan gikan sa pag-abuso sa gobiyerno ngadto sa mga yanong Pilipino.

Diha usab kuhaon ang pundo alang sa Human Rights Promotion Service nga mao ang training para sa mga law enforcers ug sa mga sector sama sa kababayen-an, tigulang, PWDs, kabataan ug uban pa. Gibutyag ni Odron, kung magkinaunsa man gani ang Commission En Banc nga gilangkoban sa Chairperson, ug upat ka commissioner sa CHR mao ang modesider kung unsay aksyon ila buhaton isip policy making body sa CHR isip institution.

Gipasalamatan hinuon ni Odron ang tulo ka mga kongresista sa Sugbo nga nidepensa sa budget nila sa CHR. Usa kanila si Kongresista Raul del Mar sa North District sa Cebu City.

“We used to threaten agencies with reducing their annual budget to one peso or zero. Must have been adjusted to inflation,” matud ni del Mar.

Gipasabot ni del Mar nga salikwaot kaayo nga kuhaan sa budget ang independente nga ahensiya nga gimugna sa Konstitusiyon nga moatiman sa mga importante kaayo nga mga butang sa pagpanalipod sa katungod sa katawhan.

Matud ni del Mar nga nasayop lang ang pagsabot sa uban nga ang CHR nagdepensa sa mga dautan ug kriminal diin ang tinuod mao nga ang ahensiya maoy magpakgang sa mga abuso sa mga naa sa gahum.

Kung duna may pagkuwang ang CHR, sumala pa ni del Mar dili sakto nga piangan na hinoon sa ilang gimbuhaton. Si Gobernador Hilario Davide III sa iyang bahin miingon nga dili makiangayon ang gibuhat ngadto sa CHR.

“With the one thousand budget I doubt, that’s tantamount to abolishing CHR already what can they do with the 1, 000?” pangutana pa sa gobernador.

Kompiyansa hinoon si Davide usbon ra kini sa bicameral conference.

Si Konsehal Jose Daluz III miingon nga ang paglaslas sa pundo maisip nga  “unconstitutional” kay usa ka constitutional body ang CHR nga gimando sa balaod nga kinahanglang pundohan ug suportahan sa gobiyerno aron kini makahimo sa ilang mandato. Bisan ang kontrobersiyal nga hepe sa kapulisan sa Ozamis City nga si Chief. Insp. Jovie Espenido wala mahimuot nga gipagamyan ang budget sa Commission og Human Rights alang sa tuig sa 2018.

“Di sad. Sa akoa check and balance na para sila magmonitor di nang manobra ra sad sila ba. Ang CHR maayo pero ang dili maayo kay kanang apilon nila ang presidente nga way labot sa sitwasyon,” si Espinido miingon.

Matud pa sa maong hepe nga buot niyang ipaabot sa CHR nga ang gukdon unta mao ra ang nakasala sama sa pipila ka mga polis nga positibong gitudlo sa mga ebidensya ug mga saksi nga sila nakapusil patay og mga inosente.

“Manarget man gud hinuon sa speculation lang. Way ebidensya. Pero kanang moingon   nga ang polis namusil sa walay sala, bisag death penalty gihapon. Way problema na kay siya man. Tubagonon niya ang iyang gihimo. Ayaw lang ang president ug Chief PNP,” matud pa ni Espenido.

Apan si Cebu City Mayor Tomas Osmeña pabor sa pagpakunhod sa budget sa maong buhatan ug mipasangil nga mas gipaboran sa CHR ang mga kriminal inay sa mga biktima.

Samtang si Konsehal Raymond Garcia miingon nga kinahanglan gyud nga magpabiling independente ang CHR. Apan sukwahi sa gipaabot nga reaksyon nunot sa daghang pagsaway ngadto sa CHR, mas daghang mga netizens ang wala malipay sa maong kalamboan.

Mas daghang mga netizens ang nasagmuyo niini ug ang uban nanawagan pa sa ubang netizens nga mag-amotay na lang aron isuporta sa operasyon sa CHR. (BANAT NEWS)