Banat ( Leaderboard Top ), pagematch: 1, sectionmatch: 1

P2.5M shabu nasakmit

CEBU, Philippines — Mokabat P2.5 Milyones nga balor sa shabu ang nasakmit gikan sa upat ka mga dinakpan sa buy-bust operation sa Barangay Kalubihan, T. Padilla ug Tejero sa  Dakbayan sa Sugbo niadtong Martes sa gabii.

Nadakpan sa mga sakop sa City Intelligence Branch didto sa dalan P. Lopez, Barangay Kalubihan ang usa ka Carlota Ramas Alonzo alyas Lota o Liza, 36, residente sa Barangay Tabunok Talisay, Dakbayan sa Sugbo.

Nakuha gikan sa maong dinakpan ang usa ka dako ug lima ka gagmay nga pakete sa gidudahang shabu nga   gibana-banang mobalor og P1,182,360.

Matud pa sa hepe sa CIB nga si Chief Insp. Christopher Navida nga ilado sa mga piniriso sa drugas sa Dakbayan sa Talisay si Alonzo ug siya ang gibansagan nilang ‘Madam.’

Usa sa mga surrenderee sa Barangay Ermita niadtong tuig 2016 si Alonzo apan matud pa nga mibalik kini og pamaligya, si Navida miingon.

Matud niya konektado si Alonzo sa napatay nga drug lord nga si Rowen Torrifiel Secretaria alyas Yawa  ug ig-agaw kini ni Romy Ramas alyas Omi kinsa natanggong karon sa Mandaue City Jail  tungod gihapon sa kaso sa ilegal nga droga.

Ang impormasyon bahin kang Alonzo nahipos gikan sa usa ka inmate sa Cebu City Jail hinungdan sa gilusad nga operasyon.

Samtang sa Imus New Road, sa Barangay T. Padilla nadakpan ang usa ka Ozner Navarro Nabua, 28,  residente sa Quijano Compound, Barangay Calamba. Nakuhaan siya og duha ka dagkong pakete ug lima ka gagmay’ng pakete sa gituohang shabu nga moabot lapas P1 milyon.

Samtang sa Barangay Tejero, nasikop sa buy-bust ang upat ka gituohang durugista ug ang target sa maong operasyon nga si Janet Dela Cruz Paslon, 52, nga giingong iyaan sa usa ka miyembro sa Dela Cruz Drug Group nga si Gerodis ‘Odis’ Dela    Cruz.

Laing  nangadakpan mao sila si Irene Cruz Punis 40, Jeffrey Garcia Mabalatan, 26 ug si Arnel Lacson Jumawan, 34, sila nakuhaan tanan og tulo ka gagmay’ng pakete, tulo ka medium nga pakete ug pipila ka mga drug paraphernalia nga mokantidad tanan og P200 mil.

Samtang nadakpan usab sa Barangay Lamac, lungsod sa Consolacion sila si Edison Calaga,  ug Reynaldo Palompon nga unang gialarma tungod kay armado.

Nasikop si Calaga ug nakuhaan og usa ka .38 revolver nga may unom ka bala, usa ka gamay nga putos sa shabu ug drug paraphernalia. Samtang si Palompon  nakuhaan og marijuana. (BANAT NEWS)

  • Follow Us: