Banat ( Leaderboard Top ), pagematch: 1, sectionmatch: 1

2 nakalas sa Japanese encephalitis sa Sugbo

CEBU, Philippines — Nakalas ang duha ka bata sa Japanese Encephalitis sa Sugbo niadtong tuig 2016 human niigo ang maong sakit sugod niadtong tuig 2015.

Kini ang gitug-an ni Dr. Shelbay Blanco, pangulo sa Department of Health-7 Regional Epidemiology Surveillance Unit.

Base sa ilang talaan sa tuig 2015, aduna silay duha ka kaso, sa 2016 lima ka kaso ug duha ang patay ug 2017 adunay usa kaso sa mga nasakit sa Japanese Encephalitis.

Sumala pa ni Blanco ang nakalas niadtong tuig 2016 nagpangedaron og lima ka buwan ug 10 ka tuig ug pulos lalaki.

Gitug-an ni Blanco nga ang simptomas sa maong sakit mao ang fever chills, nausea, vomiting ug confusion nga moresulta sa neck stiffness, seizures, paralysis, coma ug kamatayon.

Si Dr. Von Phillip Baton, coordinator sa Re-Emerging Infectious Disease Program, nibutyag nga ang maong sakit kasagaran makuha sa lamok nga adunay daghang kahayupan sama sa piggery ug uban pa hinungdan nga kinahanglan nga kanunay gyud manglimpyo ang katawhan sa palibot.

Ang vaccine sa maong sakit anaa pa sa mga pribado nga tambalanan nga kantidad sa dili molapas sa P4,000 ug malaumon ang DOH-7 nga sa sunod tuig aduna na silay vaccine para niini. (BANAT NEWS)

  • Follow Us: