CV di pa andam sa pederalismo

CEBU, Philippines — Dili pa haum ang pederalismo sa Central Visayas base sa pagtuon sa Philippine Institute for Development Studies tungod sa kakuwang sa tax base.

Kini ang gibutyag ni Rosario Manasan, Senior Research Fellow sa PIDS, nga nahinabi sa Banat News.

Matud ni Manasan nga gipaabot nga sa dili pa matapos ang katapusan nga kwarter makapagawas na sila sa resulta sa ilang pagtuon.

Base sa inisyal nga pagtuon nakita nila ang National Capital Region ug Region 4A ang adunay kahigayonan nga makahimo na sa federalism tungod kay sila ang adunay dako og potential gumikan sa daghang economic activities, kusog ang industry ug dako ang ilang tax base nga haum sa ilang panginahanglanon.

Sumala pa ni Manasan nga maglisud ang ubang rehiyon tungod kay kuwang ang ilang tax base ug dili magtugma sa ilang panginahanglanon ang ilang income.

Gitug-an ni Manasan nga adunay kapilian ang rehiyon nga gitawag og Opting In o Opting Out diin kadtong mga rehiyon nga andam na sama sa Bansang Moro mahimo na sila sa pederalismo.

Matud ni Manasan nga magmalampuson ang Federalism kung adunay lig-ong political party diin walay balimbing ug walay political dynasty nga mahitabo.

Ang pagtuon sa PIDS ipresentar sa tanang opisyal sa kagamhanan ug sa tanang gusto makabaton ug masayud niini. (BANAT NEWS)