Dunay foul play

CEBU, Philippines — Aduna gyuy foul play sa kamatayon sa kanhi konsehal sa Dakbayan sa Mandaue nga si Beethoven “Toben” Andaya kansang nagkadugo nga lawas ug may samad pinusilan nakit-an didto sa giabangang lawak sa usa ka beach resort sa Barangay Liloan, Santander niadtong Lunes.

Matud pa sa kasamtangang hepe sa Santander Police Station nga si Police Supt. Mario Baquiran Jr. adunay task group nga giumol ang Cebu Provincial Police Office alang sa imbestigasyon sa maong krimen.

Motabang kanila ang Provincial Intelligence Branch nga gipangulohan ni Police Supt. Joie Pacito Yape.

Alas 8:50 sa gabii, adlaw’ng Domingo mi-check in si Andaya ubos sa pangalang Boy Andaya. Usa ka basiyo sa bala  ug usa ka slug sa .9mm nga bala ang nakit-an sa maong lawak.

Apil sa unang anggulo nga gisubay nga naghikog kini tungod sa .9mm nga armas duol sa iyang tuong kamot apan ang pamilya miingon nga walhon ang biktima.

Laing anggulo mao ang robbery with homicide kay nagkatag na ang gikan-an sa biktima timailhan nga dunay komosyon nga nahitabo.

Butyag ni Baquiran nga personal grudge ug pagpangawat na ang gitan-aw karun nga mga motibo tungod kay adunay gun burns ang walang kamot ni Andaya nga nagpakita lang nga gisuwayan niya sa pagpugong ang pusil nga gition ngadto sa tuong bahin sa dughan.

Si Baquiran miingon nga mibutyag ang igsuon sa biktima nga si Eugene Andaya nga tag P20mil hangtud P30 mil ang kwartang dalhon sa igsuon kun kini molakaw apan  kapin usa na lang ka libo ang ilang narekober sa lawak ug nawala ang duha ka cellphones niini.

Matud pa nga adunay duha ka guests sa maong resort nga nakakita nga dunay misulod nga duha ka mga lalaki nga nanuktok sa pultahan sa biktima ug gipasulod ra kini dayon niini.

Naa sa 5’5 hangtud sa 5’6 ang gitas-on sa duha ka mga lalaki dugang pa ni Baquiran.

“Yung cottage, pwede po anuhin yung kurtina at tingnan kung sino yung kumakatok. Sa tingin ko kakilala niya siguro,” pagduda ni Baquiran.

Gibana-bana sa medico legal nga gipusil patay ang biktima alas 9:30 hangtud sa alas 11 sa gabii tungod kay gahi ug luspad na kaayo ang patay’ng lawas niini dihang nadiskubrehan pasado alas 10 sa buntag adlaw’ng Lunes.

Hangtud niining pagsuwat, blangko pa ang kapolisan kun nganong nag-commute lang kini ug wala magdala og sakyanan paingon sa resort hasta na sab kun nganong wala niya dalha ang iyang pamilya nga regular man niya kining kuyogon sa maong resort matag Sabado ug Domingo. (BANAT NEWS)