Luna sa Kapitolyo sa IT Park himuong parking area

CEBU, Philippines — Nakig-alayon ang Cebu City Government sa Provincial Government mahitungod sa tinguha sa siyudad nga maoy modumala sa luna nga iya sa probinsiya aron himoon kining parking area. Niadtong Septiyembre 5 ning tuiga, si Cebu City Mayor Tomas Osmeña nagpadala og suwat kang Cebu Governor Hilario Davide III alang sa maong katuyuan. Unod sa suwat nga gipadala ni Mayor Osmeña nga nakadawat og impormasyon ang Office of the Mayor kalabot sa giingong nanghinobra nga pagkolekta og parking fee sa I.T. Park nga moabot sa P50.

Dunay mga mireklamo niini ilabi na kadtong mga nanarbaho sa Business Process Outsourcing (BPO) Industry kay matud pa dako ra ang maong kantidad.

Nakalatid sa suwat nga gipadala ang tinguha sa siyudad nga mogamit ug modumala sa provinced-owned lots isip parking lot atubangan sa I.T Park ug ang atbang niini usa ka iladong tindahan sa mga sakyanan. Nagkanayon si Francisco “Bimbo” Fernandez, Executive Assistant ni Mayor Osmeña gusto suportahan sa mayor ang BPO ug aron mas molambo maong nangita kini og pamaagi kun unsaon nga makunhoran ang P50 nga parking fee.

Dugang ni Fernandez, ang siyudad dili interesado sa kita sa himoong parking area kay andam kining mohatag sa tanang kita sa parking fees ngadto sa probinsiya kay ang tumong lang sa mayor nga matabangan kining mga nangita og kaparkingan sa IT Park.

Kun mosugot ang probinsiya ang siyudad mopagawas og pundo alang sa paghimo sa parking area sa dapit.

Si Davide sa iyang bahin miingon nga uyon siya niini apan kinahanglan pa nga tukion sa provincial board .

“Well yeah, amicable. He offered, mo- collect siguro sila then i-share sa province,” matud ni Davide. (BANAT NEWS)