Magtutudlo nagdumili magpa-drug test

CEBU, Philippines — Mga magtutudlo na usab sa Alaska Mambaling Elementary School ug Night High School ang gipaubos sa Cebu City Office for Substance Abuse Prevention (COSAP) sa random drug test kagahapon.

Ang maong tunghaan dunay lima ka non-teaching staff ug 70 ka mga magtutudlo sa elementarya apan tungod kay absent ang duha maong naa nalang sa 68.

Apan sa 68, ang pangulo sa COSAP Garry Lao miingon dunay usa ka magtutudlo ang nagdumili nga magpa-drug test.

Matud ni Lao, ang maong magtutudlo katulo giadto sa iyang mga kaubang mga magtutudlo sa classroom niini apan giingong naglain ang lawas niini ug nagsigi og suka ug ni-request matud pa nga moadto sa Cebu City Medical Center.

Nunot niini, si Lao nakig-estorya sa prinsipal sa nahisgutang tunghaan tungod kay mangayo ang COSAP og incident report kalabot matud pa sa pagbalibad sa maong magtutudlo ug gipaabot karong adlawa kini ihatag.

Maghuwat siya sa report nga ihatag apan siya mipahimangno nga ang pagbalibad sa kawani magpa-drug test paglapas kini sa DepEd memorandum.

Gipahibawo na sab sa COSAP si Cebu City Mayor Tomas Osmeña kalabot sa maong insidente.

“Wala gyud siya nagpa-drug test only what he did is niadto og CCMC to undergo a laboratory unya niingon ko nganong laboratory man nga ang atong gipangayo is a drug test. We will wait for the report because ang iyang gibuhat is refusal to undergo a drug test which a violation of the DepEd Memorandum to undergo the mandatory drug test for a public school teacher in public school. Iyang giingon he is not feeling well, high blood daw, pero it will not affect sa imong pagsuka nga di diay ka ka-ihi what we only ask is the urine sample,” asoy ni Lao.

Human sa mga magtutudlo sa elementary sa Alaska Mambaling gisunod usab dayon ang mga magtutudlo sa Night High school nga 26 ka buok ug tulo ka non-teaching staff.

Sama sa Regino Mercado Elementary ug Night High School gipaagi usab og bunot-bunot ang pagpili sa Alaska Mambaling ug ang DepEd nag-umol og working committee aron maoy mo-handle sa drug test.

Nasayran nga adunay tulo ka magtutudlo sa Regino ang wa makapa-drug test ug sigon ni Lao nga ilaha nang gitugyan sa DepEd kun unsay ilang buhaton kanila.

Posible sa adlaw’ng Biyernes pa mahibaw-an ang resulta sa drug test sanglit buhaton diin duha ka tunghaan matag adlaw. (BANAT NEWS)