Kanhi konsehal patay

CEBU, Philippines — Napalgang patay ug naligo sa iyang kaugalingong dugo ug adunay samad pinusilan si Beethoven “Toben” Andaya, kanhi konsehal sa Dakbayan sa Mandaue diha sa usa ka beach resort sa Barangay Liloan, sa Lungsod sa Santander kagahapon sa buntag.

Matud pa ni Police Supt. Mario Baquiran Jr., hepe sa Santander Police Station nga si Andaya residente sa Barangay Paknaan, Dakbayan sa Mandaue ug miadto sa Santander  ug nag-inusarang mi check-in sa usa ka resort.

Si Baquiran miingon nga ang staff sa maong resort nga ilang gikahinabi miingon nga alas-8 sa Domingo sa gabii mi-check in ang maong kanhi konsehal ubos sa pangalang Boy Andaya.

Sa inisyal nga imbestigasyon, walay laing dala si Andaya kundi ang iyang usa ka bag ug matud pa wala gani kini magdala sa iyang sakyanan, si Baquiran miingon. Miingon usab ang maong hepe nga sa imbestigasyon nasuta nga regular nga kustomer si Andaya kauban ang pamilya niini sa maong resort  apan niadto lang higayona siya nag-inusarang ni-check-in.

Pagkaalas 7:45 sa buntag nabantayan  usa sa mga empleyado nga nagkang-a ang pultahan sa kwarto ni Andaya mao nga gilili kini ug didto nakita nga nagbuy-od ug wala nay kinabuhi si Andaya. Nakaangkon og samad pinusilan sa walang bahin sa iyang dughan si Andaya.

Nagkatag na ang mga kwarta niini ug duna say napalgang kalibre .9mm nga pistola sa tuong kamot ni Andaya, butyag ni Baquiran.

Sa dihang ilang gikahinabi ang ubang mga ni-check in dapit sa kwarto ni Andaya, nasuta nga adunay duha ka mga lalaki ang nakit-ang misulod sa iyang kwarto alas 9:45 sa gabii apan wala silay nadunggan nga komosyon.

Walay nakakita sa mga nawong sa duha ka mga lalaki nga misulod sa kwarto ni Andaya kay ngitngit ang lugar.

“Wala ding CCTV kasi ‘yung CCTV nila nakatutok lang dun sa Admin office nila. Yung barangay tanod naman na hi-nire nila na maging security guard eh dun lang nakatoka sa Admin din,” si Baquiran miingon kinsa mosusi kon naghikog o gitulis kini.

Dili motuo ang pamilya ni Andaya  nga naghikog kini kay walay bug-at nga problema si Andaya ug usa pa walhon kini apan ang armas nakita sa tuo niining kamot. Ipaubos sa paraffin test ang mga kamot ni Andaya  ug ipaubos sa ballistic test ang bala nga miigo kaniya apil ang armas nga nakuha sa crime scene.

Ang ikaduhang anggulo mao ang posibilidad nga gitulis kini ug gipatay sa mga tulisan tungod kay nagkatag na ang mga lingkuranan ug anaa na sa sawog ang usa ka botelyang soft drink ug usa ka botelya sa tubig timaan nga dunay nahitabong komosyon, tataw sa maong hepe.

Gawas pa niana, ang kwartang narekober sa kapolisan pulos na lang mga sensilyo.

“Maliliit na lang na denomination ang nandun,”matud pa ni Baquiran.

Gianugnan si Bise Gob. Agnes Magpale sa pagkamatay ni Andaya kinsa personal niyang kaila ug gihulagway niya nga maayo ug buotan nga pagkatawo.

Samtang si Board Member Thadeo “Jonkie” Ouano dili  makatoo sa nahitabo kang Andaya kinsa iyahang higala hasta ang pamilya niini.

Si Andaya mao ang running mate sa iyang igsoon nga si Emmarie “Lolypop” Ouano sa pagdagan niini pagkamayor niadtong 2016 elections.

Gihulagway ni Ouano nga “happy go lucky” nga pagkatawo si Andaya ug maayo nga tawo ug subo alang kaniya ang nahitabo sa kanhi konsehal. (BANAT NEWS)