Call Center City gitinguha

CEBU, Philippines — Positibo ang tubag sa Business Process Outsourcing (BPO) operators sa tinguha ni Cebu City Mayor Tomas Osmeña sa pag-ugmad sa Call Center City human sa ilang tigum.

Matud ni Osmeña nga ang konsepto sa Call Center City mao nga makakuha og acceptance rating nga moabot og 80 ngadto sa 90 porsiyento gikan sa mga call center agents.

Ang mga call center agents matud pa ang maka-impluwensiya sa desinyo sa proyekto.

Tinguha sa mayor nga makahatag og kalambuan dili lang sa kabatan-onan apan sa tanan ug ang venue nga iyang gigamit mao ang BPO.

Gihulagway sa mayor nga lisud nga mahimong call center agent gumikan sa mga stress mao nga gitun-an gyud og maayo sa siyudad ang pagtukod og Call Center City sa South Road Properties aron ang stress ug uban pa makunhod og 80 porsiyento.

Giplanuhan nga ibutang sa Call Center City ang boarding house aron dili na mag-commute pa ang mga trabahante ug uban pang mga panginahanglanon sanglit himoon kining one-stop-shop.

Lakip sa konsepto nga ang mga call center agents mahimong mo-eskwela og masteral o kaha law nga dili na moundang sa ilang trabaho tungod kay dili na hasol kay naa ra sa usa ka lugar.

Usa ka call center jobs fair ang gipahigayon niadtong Sabado diin sigun ni Osmeña nga moabot sa 500 ang nadawat sa trabaho ug gani duna pay mga senior citizens nga ni-apply.

Nagplano ang mayor nga sa dili pa ang Disyembre mohimo kini og laing call center jobs fair ug mas i-localized.

Gipasalig sa mayor nga mahimong number one ang Sugbo sa call center destination ug iyang giangkon nga magkinahanglan kini og taas nga panahon apan masaligon siya nga mo-number one ang Sugbo tungod kay ang mga call center agents sa nagkalain-laing lugar moanhi na tungod sa Call Center City. (BANAT NEWS)