14 nasikop tungod sa drugas

CEBU, Philippines — Katorse ka tawo ang nasikop ug duha ka armas ug pinaketeng shabu ang nasakmit sa kapolisan sa managlahing operasyon sa Sugbo.

Nadakpan sa grupo ni Chief Inspector Mark Gifter Sucalit, hepe sa City Intelligence Branch (CIB) sa Lapu-Lapu sila si Jacinto Pino Silawan Jr., 42, Elmer Mangubat Booc, 40, ug Alcher Motante Sipalay, 39.

Nasakmit gikan kanila ang 39 ka gagmay nga paketeng shabu, P460 nga gituohang halin ug armas nga kalibre .22 magnum uban sa upat ka mga bala ug P200  nga marked money.

Nadakpan usab  silang Antidio Ugsang Sepe alyas Titing, 63, ug Arnel Malinao Estrando, 41, taga Humay-Humay, Baragay Gun-ob sa maong dakbayan ug nakuhaan  og 12 ka gagmay nga paketeng shabu ug uban pa.

Samtang sa laing operasyon sa Consolacion police station, nadakpan sila si Francis Alvin Sandega Arrisgado, 27, Charles Chan Cang, Joeyce Lisondta Tulo, 28, ug Enrique Lacio Gotar, 33 , nga pulos  nakuhaan og mga pinaketeng shabu.

Samtang nasikop ang anak sa retiradong polis ug iyang amigo sa checkpoint diha sa Barangay San Roque, Talisay City human sila nakuhaan og ilegal nga drugas ug armas.

Ang mga dinakpan mao sila si Windel Bartolaba, 32, ug si Jiejie Alforque, 26, nagpuyo sa Sitio Apache, Barangay Tanke. Ang duha sakay sa usa ka ‘skeleton’ nga motorsiklo apan kalit mibalik sa agi maong ilang gigukod ug nadakpan.

Nakuhaan si Bartolaba og usa ka medium nga pakete sa shabu ug duwaan nga pusil samtang si Alforque nga anak sa retiradong polis nakuhaan og .22 magnum ug 10 ka gagmay nga pakete sa shabu.

Sa Cebu City, nadakpan diha sa Sitio Cogon, Barangay Labangon sa mga sakop sa Punta Police Station si Alfredo Pardillo, 36, taga Tupas Street, Barangay Sawang Calero ug usa ka 15-anyos nga taga Barangay Ermita. - /IBM) (BANAT NEWS)