Embalmer gisikop, giingong sakop sa mga Parojinog

CEBU, Philippines — Embalmer ug drayber  sa usa ka punerarya sa Dakbayan sa Toledo, nasikop sa mga tinugyanan sa Criminal Investigation and Detection Group kay naghupot kini og nagkadaiyang armas ug gituohan sab kini nga nalambigit sa mga Parojinog sa Ozamis City.

Ang nasikop mao si Dennis Torrejos, 40-anyos, taga Barangay Kabituonan, Toledo City.

Matud ni PCIns. Chuck Barandog, hepe sa CIDG, nakadawat sila og taho nga naghupot og armas si Torrejos ug ila pang susihon ang laing inpormasyon nga giingong aduna kini kontak sa mga Parojinog sa Ozamis City.

Sumala ni Barandog, ang dinakpan adunay daghang klase-klase nga negosyo lakip na ang pagpanag-iya niini og mga nindot nga balay ug pagpautang og dinagko nga kantidad sa salapi.

Palawman sab sa CIDG ang ilang imbestigasyon batok sa dinakpan, kinsa nagmintenar og duha ka kalibre 45 nga pistola, usa ka ingram ug mga bala.

Si Torrejos sa iyang bahin, nihimakak sa mga pasangil nga nalambigit siya sa mga Parojinog kay nagbata siya og negosyo hinungdan nga nakapalit siya og mga propeyidad ug nakapaabang og mga sakyanan nga himoong porlon sa mga punerarya sa Toledo.

Gibutyag usab niini nga dako ang iyang pagtuo nga adunay nasuya ug naglagot kaniya hinungdan nga iyang atubangon ang reklamo batok kaniya, kay dili iyaha ang mga armas ug giingong giprenda ra kini ngadto kaniya. - /DILT) (BANAT NEWS)