Korte mi-freeze sa assets ni Sabalones

CEBU, Philippines - Giduso na kagahapon sa Philippine Drug Enforcement Agency sa buhatan sa Registry of Deeds ang Asset Preservation Order nga giluwatan sa Office of the Executive Judge Branch 18 Gilbert Moises alang sa mga kabtangan ug bahandi ni Franz Sabalones nga mobalor og kapin P350 Milyones nga gidudahang gikan sa ilegal nga  drugas.

Matud pa ni PDEA-7 Regional Director Yogi Filemon Ruiz, ang ilang mga dokumento ug ebidensya nga giduso atol sa ilang gipahigayon nga imbestigasyon maoy gipaboran sa huwes hinungdan nipaguwa kini og APO. Matud ni Ruiz, pinaagi sa APO dili mahimong hilabtan sa mga Sabalones ang mga kabtangan niini apil na ang pundo sa mga bangko ubos sa iyang pangalan.

Sumala pa ni Ruiz, base sa pangangkon sa abogado ni Sabalones napalit na ang uban mga propriyedad ug dili na kini sa mga Sabalones, apan ang korte nipabor sa ilang mga ebidensya nga giduso.

Dugang pa ni Ruiz, mahimo pa makapakita sa ilang mga ebidensya ang kampo ni Sabalones apan ngadto na sa Court of Appeals ug Supreme Court.

Masaligon si Ruiz nga lig-on ang mga dokumentong ilang gihuptan ug maoy iyang pagtuo nga mapunta kini pabor ngadto sa National Treasury sa dili pa matapos ning tuiga gumikan sa kapaspas sa dagan sa kaso.

Gitug-an ni Ruiz, kung magmalampuson ang maong kaso, usa kini ka dakong kalamposan  sa PDEA-7 tungod kay niabot gayud sila sa punto nga makapagawas ang korte og Asset Preservation Order batok sa mga gidudahang drug lords.

Gibutyag ni Ruiz, tinguha nila padlakan tanan mga kabtangan ni Sabalones, aron dili na kini maka-operate ug mapahimuslan. (BANAT NEWS)