Comelec pabor sa Mayo ang barangay, SK elections
CEBU, Philippines - Pabor ang Commission on Elections sa Probinsiya sa Sugbo nga ipahigayon ang Barangay ug Sangguniang Kabataan Elections sa Mayo sunod tuig.
Kini kung madayon gyud ang pag-oktaba niini gikan karong Oktubre.
Wala pa napasar sa Kongreso kung kanus-a gyud ang eleksiyon sanglit ang gipilian mao ang Mayo o ang Oktubre 2018.
Si Atty. Lionel Marco Castillano, provincial election supervisor, nagkanayon nga mas mopili sila nga sa Mayo ipahigayon ang piniliay sanglit walay klase.
Matud niya nga kung sa Mayo ang piniliay, walay trabaho ang mga magtutudlo nga maoy magsilbing board of election tellers ug bakante ang mga lawak nga gamiton alang sa eleksiyon.
Si Castillano nagkanayon nga bisan pa man nga nagkauyon na ang Kongreso nga ioktaba ang eleksiyon, wala gihapon sila moundang sa ilang preparasyon sanglit wala pay balaud nga gipasar.
Subling awhag sa Comelec ngadto sa mga magbabalaud nga desisyonan na ang pag-oktaba sa eleksiyon pinaagi sa balaud aron dili mausik ang kwarta sa ilang pagpangandam.
(BANAT NEWS)
- Latest