Ermita ang kuhaan og allowance

CEBU, Philippines - Gihatagan og katin-awan ni Cebu City Mayor Tomas Osmeña ang iyang pamahayag sa mga nangaging mga adlaw kalabot sa pagputol sa allowances sa mga kawani sa barangay sa Cebu City.

Giklaro sa mayor nga mga kawani lang sa Barangay Ermita gawas sa mga garbage loaders ang putlan og allowance ug dili ang tanang barangay.

Ang rason kun nganong giputol sa mayor ang paghatag og allowance sa mga empleyado sa Ermita kini tungod sa dili maayong gipakita sa mga kawani ug naghatag og problema sa siyudad.

Ang gitumbok sa mayor mao ang pagpangolekta sa barangay og P10 sa mga sidewalk vendors pinaagi sa mga tanod.

Ang City Treasurer’s Office nagpadala na og notisya kagahapon sa mga opisyales ug empleyado sa Ermita nga nagpahibawo nga subay na sa City Ordinance No. 1486, ang City Treasurer’s Office ang dunay mandato sa pagkolekta sa market fees.

Si Osmeña miingon nga kon magpadayon sa paghagit ang Ermita sa siyudad gamiton sa mayor ang tanan niyang legal options aron mapakgang kining gihulagway niyang iregularidad.

Nagplano usab kini nga mosang-at og kaso batok sa Barangay Ermita.

Samtang si Konsehal Dave Tumulak, Chairman sa Committee on Public Order and Safety miingon kagahapon sa kaadlawon subling nasamok ang mga sidewalk vendors kay ang ilang mga lamesa gipanguhaan og tagsa ka haligi sa mga tanod maong nangatuwad ang mga baligya.

Nahitabo usab ang panaglalis tali sa mga tanod ug sa mga tinugyanan sa Cebu City Market. Subling mihangyo ang konsehal sa mga barangay officials ug tanod nga ipaagi sa legal nga proseso ang tanan aron malikayan ang kagubot.

Sa iyang bahin si Ermita Barangay Captain Felicisimo “Imok” Rupinta miingon ang pagputol sa mayor sa allowance sa mga empleyado sa barangay pagbuot sa mayor apan kini nanghinaot nga huna-hunaon kini kay ang mga empleyado sa barangay nanarbaho man sab. (BANAT NEWS)