Ermita di mohunong kolekta og P10

CEBU, Philippines - Gipaabot nga mopagawas og cease and desist order (CDO) ang Cebu City Treasurer’s Office aron temporaryong ipahunong ang pagkolekta sa Barangay Ermita og P10 sa mga sidewalk vendors sa Carbon Public Market nga nakamugna og kasamok karon. Niadtong Hulyo 26 sa miaging tuig, mipagawas og legal opinion ang City Legal Office mahitungod sa gihimong pagkolekta sa barangay sa mga sidewalk vendors. Ang City Legal miingon nga nakalapas sa Republic Act 3857 kon Revised Charter of the City of Cebu ug City Ordinance 1486 kon Revised Market Code of the City ang gihimo sa nahisgutang barangay.

Gihulagway ni City Legal Officer Atty. Joseph Bernaldez nga kwestiyonable kini kay ang City Treasurer’s Office lang ang dunay katungod nga mangolekta og buhis ingon man market fees. “Tataw kaayo nga ang dunay obligasyon or katungod sa pagpangolekta og buhis nga due diha sa atong siyudad mao ra gyud ang City Treasurer gisegundahan pa gyud kini sa City Ordinance 1486 nga nag-ingon nga ang City Treasurer shall exercise direct and immediate supervision administration and control over the collection of market fees so klaro kaayo nga ang City Treasurer ra gyud ang makakolekta,” pasabot ni Bernaldez. 

Nagpakitabang sa kagamhanan sa siyudad ang mga apektadong manindahay aron mahatagan og kasulbaran ang ilang problema sanglit apektado na sab ang ilang panginabuhian. Nagkanayon si Maria Joy Jeonzon, usa sa mga apektadong manindahay nga 30 ka tuig na naa sa maong merkado nabalaka silang samukon sa mga tanod ug nanawagan sila ni Ermita Barangay Captain Felicisimo “Imok” Rupinta nga magsabot sa siyudad kun unsay angay buhaton ug dili unta ipiton sila nga mga manindahay.

Si Rupinta mipasangil kang Wine Miro, pangulo sa Market Operations nga maoy nagdala og kasamok sa merkado apan gihimakak kini ni Miro. Siya miangkon nga siya maoy nagpagya sa giingong pagpangwarta sa barangay. Apan si Rupinta sa iyang bahin miingon nga paabuton nila ang CDO sa siyudad aron ipabasa nila sa ilang abogado. Matud niya ang konseho maoy mohimo og lakang aron pagpawalay bili sa ordinansa nga gipasar sa previous council.

Kini midugang nga magpadayon ang ilang pagkolekta og P10 gawas lang niadtong mga gi-demolish ug mohunong lang sila kon makadawat na og suwat gikan sa siyudad.

“They are not entitled to collect, this is tantamount to extortion”, sigon pa ni Mayor Tomas Osmeña. (BANAT NEWS)