Rama, kaubanan gikiha ni Osmeña

CEBU, Philippines - Gipasakaan og kasong kriminal ug administratiba ni Cebu City Mayor Tomas Osmeña sa Office of the Ombudsman-Visayas si kanhi mayor Michael Rama ug laing unom ka mga department heads atol sa administrasyon ni Rama may labot sa giingong transaksiyon sa siyudad sa Asian Energy System Corp.

Ang mga gipasakaan mao sila si Rama ug ang mga sakop sa Bids and Awards Committee panahon ni Rama nga sila si Dr. Ester Concha, Belinda Navascues, Rolando Ardosa, Conrado Ordesta, Atty. Collin Rosell, Dionisio Gualiza ug Asian Energy System Corp.

Sila gipasanginlang nakalapas sa Section 3(e) sa Republic Act No. 3019 kun Anti-Graft Corrupt Practice Act, Falsification of Public Documents, Grave Misconduct, Serious Dishonesty ug Gross Neglect of Duty.

Giingong  ang duha ka procurement sa Garbage Waste Disposal Services niadtong Disyembre 2013 ug Marso 2014 matud pa si Engr. Gualiza kanhi pangulo sa Department of Public Services mi-certify  nga ang Asian Energy System Corp. lang nag-inusarang supplier.

Kini bisan ang Bids and Awards Committee wala mopahigayon og public bidding ug gikuha ang serbisyo sa Asian Energy pinaagi sa direct contracting ug gi-award ang duha ka purchase order nga nagkantidad og kapin sa P25 milyones.

Apan ang Commission on Audit ug Department of Environment and Natural Resources (DENR) ug Environmental Management Bureau (EMB)-7 mipagawas og pamahayag nga dili lang ang Asian Energy ang supplier apan dunay daghan.

Matud usab sa COA ang duha ka procurements nga wala’y public bidding bisan og dunay available nga mga landfill operators nakalapas sa provisions sa Republic Act No. 9184 kun Government Procurement Reform Act.

“Klaro kaayo, baho kaayo kining transaksiyon, you can see this one Garganera’s body language no not here, not there parang the only way to is to go to Consolacion, because if we will go directly to Consolacion what’s going to happen I will be just as guilty as Mike Rama so I cannot file a case anymore,” asoy ni Osmeña.

Si Rama sa iyang bahin miingon nga andam niya tubagon ang kaso nga gipasaka ni Osmeña batok niya ug mga kaubanan. Apan gikwestiyon niya nganong sa Ombusman gipasaka ni Osmeña ang kaso nga wala naman kini sa gobiyerno.

 “Sa iyaha, he has to answer ang iya karon, remember nga ang iyang manage sa garbage, highly questionable. I don’t know if that’s diversionary tactic. Basta for me, there’s nothing to be afraid and there’s nothing to hide,” matud ni Rama. (BANAT NEWS)