Idlas nadakpan, minor naluwas

CEBU, Philippines - Nadakpan ang giilang idlas nga pusher og shabu sa Sitio Kalubihan, District 2, Pulpogan, Consolacion ug naluwas usab ang 17-anyos sa buy-bust operation alas 11 pasado sa niaging Martes sa gabii.

Si Police Officer 1 James Michael Borres sa Consolacion Police Station niila sa ilang nadakpan nga si Albert Cinco Icoy alyas Ok-ok, 19, nagpuyo sa maong dapit.

Matud ni Borres nga giila nga level 2 drug pusher ang dinakpan nga dugay na nilang gipanid-an ang ilegal nga kalihukan sa maong lugar.

Nasakmit gikan sa dinakpan ang usa ka gamay nga paketeng shabu nga maoy napalit sa P200 nga marked money nga gibayad sa police decoy.

Sa laing buy-bust operation naluwas ang 17-anyos nga nagbaligya usab og shabu sa maong dapit.

Gitunol sa batan-on sa poseur buyer ang usa ka gamay nga pakete sa shabu bugti sa P200 nga marked money. Dihang girekisa ang lawas sa batan-on ilang nakuha ang siyam pa ka gagmay nga pakete. - /GMR) (BANAT NEWS)