Duterte duphan ni Dela Rosa

CEBU, Philippines - Duphan ni Philippine National Police Chief Police Director General Ronald ‘Bato’ Dela Rosa ang administrasyon ni Presidente Rodrigo ‘Digong’ Duterte batok sa gikatahong destabilisasyon sa pipila ka mga sakop sa Armed Forces of the Philippines ug Philippine National Police.

“Over my dead body.” Mao kini ang tubag ni Dela Rosa bahin sa gikatahong destabilisasyon batok sa administrasyon ni Duterte.

Matud pa ni Dela Rosa nga kon nakakuha og 84% approval rating si Duterte sa publiko, 101% ang approval rating nga ihatag sa PNP kaniya mao nga imposibleng mahitabo ang giingong destabilisasyon.

“Kana ginapanghambog nila nga duna daw membro sa AFP ug PNP nga usa ka grupo nga mag-oust kang president. Di ko sigurado kay kami sa kapolisan mga solid mi behind our president, kabalo mi. Sa tibuok natong kinabuhi, karon ra ta nakabaton og presidente nga grabe mosuporta sa iyang kapolisan. So, unsa man ang among rason para magrebelde? Siguro ang magrebelde sa kapolisan, kadtong mga polis nga gidemalas sa panahon ni Duterte. Kadtong mga narco-cops? Kadtong nangagot? Possible…”, si Dela Rosa miingon.

Unang mitumaw ang issue sa destabilization human nga gikatahong gisaway ang duguong pakigbatok ni Duterte sa druga.

Nibalik kini human sa kamatayon sa usa ka 17-anyos nga batang lalaki nga gipusil patay sa mga pulis nga mipahigayon og drug operation batok sa maong batan-on.  Giila ang maong namatay nga si Kian Lloyd Delos Santos.

Angkon ni Dela Rosa nga hangtud karon wala siya miduaw ug dili gyud siya moduaw sa haya sa maong bata.

“Nganong moadto man ko? Di man ko politiko. Mag-plastic-plastic ko ngadto nga kabalo ko nga suko kaayo ang pamilya sa police kay ang police ang nakapatay sa ilang anak. Unya moadto ko ngadto? Ipalaparo nako akong nawong ngadto sa inahan ato. Kung makit-an ko masuko to…. Ang ako lang it’s enough nga ako na lang ipangadyi in my own little way,” niingon si Dela Rosa.

Samtang mipadayag ang maong hepe nga dili siya gamhanan aron mapugngan ang sitwasyon nga diin adunay makalas sa operasyon.

“We will not stop our operations but we will do it properly. Tarungon nato nga wala’y kinabuhi nga masayang,”dugang ni Dela Rosa. - /EIM) (BANAT NEWS)