Dul-an 100 balay naugdaw

CEBU, Philippines - Dul-an 100 ka balay ang naugdaw ug walo ang partially burned atol sa sunog nga niigo sa 6.5 relocation site sa Sitio Mahayag, Zone Ahos, Barangay Paknaan, Dakbayan sa Mandaue alas 2:05 sa kaadlawon adtong Miyerkules.

Matud pa ni Fire Senior Supt. Samuel Tadeo, Rehiyonal nga Direktor sa Bureau of Fire-7 base sa report nga iyang nadawat gikan ni Senior Fire Officer 1 Socrates Jude Nacua Jr., nagsugod ang sunog sa panimalay ni Estella Abad.

Wala pa hinoon sila’y tinubdan sa sunog kay gipaubos pa kini sa imbestigasyon. Matud niya giisa  ngadto sa task force alpha ang maong sunog ug nakontrolar alas 2:41 sa buntag ug hingpit napawong alas 3:07.

Nasayran nga adunay tulo ka mga bata ang nasalbar gikan sa nasunog nilang balay.

Matud pa ni SFO1 Nacua ang mangsuon lamang nga 10-anyos, 4-anyos ug 3-anyos maoy nahibilin sa balay ni Abad kay atoa sila sa kalingawan.

Suwerte nga ang sunog anha nagsugod sa ikaduhang andana ug nakabantay ang mga bata ug daling nakanaog.

Gitataw ni Nacua nga moabot gayod sa 86 ka mga two-storey houses ang naugdaw nga gipuy-an sa kapin sa 100 ka pamilya.

Duha ka anggulo ang ilang gisubay sa imbestigasyon ug kini ang naglakip sa pag-over heat sa electric fan o gidagkotang katol samtang ila usab subayon ang report nga adunay upat ka tawong giingong tuyo nga niduslit sa kalayo. Ang mga residente sa lugar mga gi-relocate nga kanhi nanimuyo sa Mahiga Creek. - /EIM) (BANAT NEWS)