General Bato moabot sa Sugbo

CEBU, Philippines - Gikatakdang moabot karong adlawa dinhi sa Sugbo si Philippine National Police Chief Ronald 'Bato' Dela Rosa sa Sugbo alang sa ika- 116 nga anibersaryo sa kapolisan.

Siya maoy personal nga motunol sa pasidungog sa mga polis ug opisina sa Police Regional Office 7 nga dalaygon ang nahimong kontribusyon sa katilingban.

Duawon usab ni Dela Rosa sa ospital ang nasamdang polis nga si PO1 Dennis Valiente.

Si Valiente naangol human mapusili sa durugista nga ilang dakponon atol sa buy-bust operation sa Barangay Mambaling niadtong Agosto 7 niining tuiga.

Hatagan usab og pasidungog ang Cebu City Police Office isip Best City Police Office samtang Best Provincial Police Office ang Cebu Provincial Police Office sa tibuok Central Visayas.

Pasidunggan sab ang duha ka mga direktor sa maong mga opisina nga silang Senior Supt. Joel Doria sa CCPO ug Senior Supt. Eric Noble sa CPPO.

Makadawat usab og special award ang Mandaue City Police Office sa ilang kalampusan sa Double Barrel ug Double Barrel Alpha sa tuig 2016. (BANAT NEWS)