Banat ( Leaderboard Top ), pagematch: 1, sectionmatch: 1

2 minors, lolo sikop sa drug bust

CEBU, Philippines - Duha ka 16 anyos nga bata ug usa ka lolo ug uban pa ang nasikop sa buwag nga mga buy-bust operations nga gilusad sa kapolisan.

Sa Sitio Maharlika, Barangay Sambag Dos ning Dakbayan sa Sugbo nadakpan sa mga sakop sa Abellana Police Station ang duha ka 16 anyos nga dalagita tungod sa pagpamaligya og drugas.

Si Police Chief Inspector Maria Theresa Macatangay mibutyag nga nakadawat og impormasyon ang ilang estasyonan bahin sa duha hinungdan sa gilusad nga operasyon.

Nakuha gikan sa duha ang duha ka gagmay ug duha ka medium nga pakete sa gituohang shabu. Natultolan usab nila ang pension house sa dalan Manalili ning Dakbayan sa Sugbo ug didto gidakop ang usa ka Christopher Sumalinog Samosa, 26,  taga Barangay Ibabao, Cordova.

Asoy ni Macatangay nga si Samosa ang tinubdan sa shabu sa maong mga dalagita. Butyag ni Macatangay nga bisan pa ang minor pasakaan gihapon sila og kaso ug tun-an sab nila ang posibleng pagpasaka og kaso sa mga ginikanan sa duha ubos sa Article 221 sa Family Code nga nag-ingon nga liable ang mga ginikanan kun unsa may krimen nga mabuhat sa ilang mga anak.

Samtang gidakop sa kapolisan ang usa ka 62 anyos nga si Benedicto Balorio ug iyang apo apil ang lima ka mga giingong drug users  sud sa gihimo niining drug den diha sa Sitio Tambis, Barangay Pooc sa Dakbayan sa Talisay.

Ang iyang apo mao si Kurt Balorio, 18 , samtang ang lima nga gidudahang nanuyop sa lugar mao sila si Briant Cabalquinto, 33, taga Biasong; Ryan Jake Baller, 31 anyos; Giovanni Lopez, 35 anyos pulos taga Barangay Mabolo Dakbayan sa Sugbo; Michael Resujento, 34 anyos, nagpuyo sa maong barangay ug Marlon Monteclaro, 33. Nakuha gikan kanila ang 14 ka gagmay nga paketeng shabu. Apan ang apohang Balorio mihimakak og kalambigitan sa maong drug den kay matud niya barkada sa iyang apo ang maong mga lalaki nga abi lang niya nag-inom. Sa laing bahin, usa ka sakop sa Citizen Armed Forces Geographical Unit (CAFGU) ) ang nadakpan sa buy- bust operation sa kapolisan tungod sa pagpamaligya og ilegal nga drugas niadtong Lunes sa buntag.

Si Inspector Emmanuel Rabaya, hepe sa Tabuelan Police Station miila sa ilang nadakpan nga mao si Marlon Rebato nga aktibong sakop sa CAFGU ug nakuhaan og walo ka gagmay nga pakete nga gituohang shabu.

Samtang nadakpan usab ang napulo ka mga lalaking gipasanginlang drug pushers sa nagkalainlaing barangay sa Dakbayan sa Lapu-Lapu ug nasakmitan og P200 mil nga kantidad nga shabu. Camille Pateres, Gabriel Bonjoc, Romeo Limpangog ug Rowena Capistrano (BANAT NEWS)

  • Follow Us: