Motor nabangga sa multicab, 2 angol
CEBU, Philippines - Nalandig sa tambalanan ang duha ka lalaking nagsakay og motorsiklo dihang sila nabangga sa multicab nga gimaneho sa langyaw sa South Road Properties (SRP) sa Barangay Cansojong, Dakbayan sa Talisay niadtong niaging adlaw.
Ang langyaw nailhan nga si Mar David Chase, 49-anyos, nga nagpuyo sa Barangay Lipata, Lungsod sa Minglanilla nga nagmaneho sa iyang multicab nga aduna’y plakang GRK 263 nga padulong sa Siyudad sa Sugbo.
Sa pag-agi niya sa lugar kalit lang nibutho ang motorsiklo nga gimaneho ni Owen Paugia, 43-anyos ug sa iyang angkas nga si Joel Vallejos, 41-anyos.
Naigo sa driver side ang nagmotorsiklo hinungdan sa ilang pagkatumba ug nakaangkon og samad ug mga pangos sa ilang kalawasan.
Ang duha pulos gidala sa Talisay City Hospital samtang ang American citizen dali sab nga nisunod nila aron sila ayudahan sa ilang panginahanglan.
Matud sa kapolisan nga magdepende na lang kini sa duha ka habig kun ila na lang ba sabuton ang maong panghitabo tungod kay disgrasya man. (BANAT NEWS)
- Latest