Medical check-up alang sa drug surrenderers
CEBU, Philippines - Ipahigayon sab sa Cebu City Office for Substance Abuse Prevention (COSAP) ang medical check-up karong adlawa alang sa mga drug surrenderers nga na-enrol sa We Care Program sa siyudad apil na sa mga outpatients.
Ang We Care Program adunay 237 ka enrollees apan naa lang sa 74 ang aktibo nga gikan sa pito ka barangay sa Sambag 2, Bonbon, Buot, Quiot, Taptap, Tabunan ug Cogon-Pardo.
Ang medical check-up naglakip sa HIV testing, X-ray, blood sampling ug uban pa.
Matud ni Garry Lao, pangulo sa COSAP, nga buot nilang masuta ang kahimtang sa panglawas sa mga drug surrenderers aron matabangan.
Nagpasalamat ang COSAP sa Cebu City Health Office ug sa ubang ahensiya nga nisanong sa ilang hangyo alang sa medical check-up nga buhaton.
Giklaro ni Lao nga ang pagpa-enrol sa We Care Program dili garantiya nga makabalik og trabaho sa barangay o kaha sa City Hall.
Ang We Care Program kaduha sa usa ka semana buhaton sulod sa duha ka oras diin duna sila’y module nga gisunod ug gipaabot nga ila kining ipangapod-apod sa 80 ka barangay.
Duna nay mga nigradwar sa We Care Program ug sigun ni Lao nga gawas sa ilang pag-adto mismo sa mga dapit alang sa ilang session, giawhag sab nila ang mga barangay nga tabangan sila sa pag-monitor. (BANAT NEWS)
- Latest
