Pag-ulan masinati gihapon
Samtang pwerhisyo alang sa uban ang baha kung mag-uwan apan kalipay kini alang niining mga bataa sa may dalan A.S. Fortuna, Dakbayan sa Mandaue sa ilang pagduwa-duwa ilabi na nga walay klase kagahapong adlawa dihang nibunok ang kusog nga uwan sa Metro Cebu.—Joy G. Torrejos
CEBU, Philippines - Ang Philippine Atmospheric Geophysical and Astronomical Services Administration (PAGASA) sa Mactan naka-obserbar og lapad nga pag-uwan sa probinsya sa Sugbo kagahapon nga posibleng mausab karong adlawa.
Si Engr. Jhomer Eclarino, weather specialist sa PAGASA Regional Services Division for Visayas, miingon nga ang pagsige og bunok sa uwan karon epekto sa Habagat (Southwest monsoon) nga mikusog tungod sa bagyo nga anaa karon sa northern Luzon.
Matud pa niya karong adlawa makasinati gihapon ang Sugbo ug ang Kabisay-an og madag-umon nga kalangitan ug mga pag-uwan samtang anaa pa sa sulod sa Pilipinas ang maong bagyo. Samtang ang sa kadagatan, ang PAGASA wala mopagawas og gale warning apan siya mipasidaan sa mga mananagat nga dili lang gyud mokompiyansa ilabi na niadtong mga gagmay nga mga panagatan ug mga gagmay nga sakyanan sa dagat. (BANAT NEWS)
- Latest
