P68M sulbad sa baha sa Talisay

CEBU, Philippines – Masaligon si Kapitan Perla Cabanes sa Barangay Tangke, Dakbayan sa Talisay nga dili na unya nila masinati ang pagbaha sa ilang lugar kon mapatuman na ang P68 milyones nga drainage project sa tulo ka barangay diin lakip ang Poblacion ug Cansojong.

Matud ni Cabanes nga gagmay kaayo ang ilang mga kanal nga dili makasugakod sa gidaghanon sa tubig kung kusog ang uwan.

Nigahin og pundo ang nasudnong kagamhanan sa tulo ka coastal barangays sa Talisay diin ang Poblacion adunay P30 milyones, P20 milyones sa Cansojong samtang P18 milyones sa Tangke.

Si Kongresista Gerald Anthony Gullas ang nipatawag sa tulo ka kapitan ingon man sa taga Department of Public Works and Highways (DPWH) aron mahisgutan ang ilang suliran.

Malaumon si Cabanes nga mahatagan na sab og solusyon ang ilang problema kabahin sa pribadong indibidwal nga nangangkon nga sila mao ang tag-iya sa parte sa yuta sa Sitio Rattan hinungdan nga nag-antus sa baha tungod kay wala nahuman ang proyekto sa ilang kanal.

Ang maong dapit mao ang kilid sa ilang barangay nga wala gyud nila nasulbad sa dugay na nga katuigan. -/GMR (BANAT NEWS)