Loy Madrigal nag-atubang og kaso

CEBU, Philippines – Nag-atubang og kasong usurpation ang kanhi hepe sa Cebu Provincial Anti-Illegal Fishing Task Force ug laing duha nunot sa ilang joint operation batok ilegal nga panagat sa Isla sa Kinatarcan, Santa Fe niadtong Agosto 26, 2015.

Hinoon ang Provincial Prosecutors Office nipakawalay sala sa laing unom nga gireklamo kinsa mga sakop sa Bantay Dagat sa Lungsod sa Daanbantayan.

Sila si Donato Villaceran ug Rogelio Forrosuelo, mga kapitan sa A.C ug JSV fishing boats, ang nipasaka sa reklamo batok ni Loy Anthony Madrigal.

Ang laing gireklamo mao sila si Romelito Edar Lirasan, Servideo Pañares, Gaudencio Rubio, Danilo Rosales, Roberto Micarsos Jr., Ronelo Aneslagon Sr., Oscar Conje ug Flaviano Monterde.

Matud ni Madrigal nga dili hiniusang operasyon kadto sa Bantay Dagat sa Daanbantayan ug San Remigio, ug mga opisyal sa Kinatarcan.

“How can it be usurpation of authority when me and the rest of the arresting officers are Bantay Dagat of San Remigio and Daanbantayan?” matud ni Madrigal.

Sumala pa ni Madrigal nga ang mga mananagat sa Kinatarcan ang nangayo og tabang kanila batok sa ilegal nga panagat hinungdan nga gihimo ang joint operation diin nasikop sila si Villaceran, Forrosuelo ug dul-an sa 40 ka kaubanan.

Apan sila si Villaceran ug Forrosuelo nangangkon nga ang kasong ilegal nga panagat nga gipasaka batok kanila bawos sa ilang gipasaka nga kasong piracy and serious illegal detention batok ni Madrigal ug kaubanan.

Gibasura sa piskaliya ang motion for reconsideration ug motion for re-raffling to another prosecutor nilang Madrigal, Pañares ug Lirasan.

Apan ang motion for reconsideration nilang Rubio, Rosales, Micarsos, Aneslagon, Conje ug Monterde ang gihatag.

“I am thankful nga na-dismiss sila kay ang uban adto wala gyud labot sa dakop, it was a harassment case against namo gikan sa mga ilegalista sa dagat. Ako ra man ang ilang target nga kasohan kay suko kaayo ang mga Villaceran sa akoa kay sige man sila kadakpan ug kini nagpamatuod nga mao gyud ni ang ilang mga abilidad ang pag-ilegal sa kadagatan,” sumala pa ni Madrigal.

Ang abogado ni Madrigal nga si Atty. Vincent Isles nisang-at na og petition for review sa Department of Justice. (BANAT NEWS)