Accomplishment report trabaho sa tanod

CEBU, Philippines – Giklaro sa pangulo sa Cebu City Office for Substance Abuse Prevention, Garry Lao, nga ang paghatag og weekly accomplishment reports sa mga barangay tanod sa siyudad dili kini dugang sa trabaho nila.

Kini aron maoy basehan sa kung angay pa ipadayon sa siyudad ang paghatag og allowance kanila nga tag P4 mil sanglit gusto sa mayor nga trabahoan sa mga tanod ang allowance nga ihatag aron sa pagsumpo sa problema sa drugas.

Dunay mga tanod nga niingon nga dili nila trabaho ang pagdakop sa mga drug pushers ingon man users.

Apan si Lao niingon nga maong dunay tanod aron motabang pagbantay sa barangay ilabi na sa pagmentinar sa kahapsay ug kalinaw.

Hinoon ang mga tanod niduso na og weekly accomplishment report tungod kay kinahanglan man sab sila motuman sa mando sa mayor.

Human madawat ni Lao ang report sa mga tanod, iya kining i-summarize ug mohatag kini og report kang Mayor Tomas Osmeña ug depende na sa mayor kung unsay buhaton niini kung putlon ba o dili ang paghatag og allowance. -/GMR (BANAT NEWS)