Recount sa Tuburan moabot sa SC

CEBU, Philippines – Dili pa angay magmaya ang mga supporters sa kandidato sa pagka-mayor sa niaging eleksiyon sa Lungsod sa Tuburan nga si Daphne Lagon sa resulta sa recount sa mga balota.

Kini human namahayag ang kadagkuan sa Commission on Elections nga moabot pa hangtud sa Supreme Court ang kaso kung dili matagbaw sa desisyon ang usa ka habig.

Ang recount sa sala ni Regional Trial Court Judge Hermes Montero giundang na niadtong Agosto 7, 2017 apan wala pa nakapagawas og desisyon ang huwes.

Apan ang kampo ni Lagon nipakita na sa resulta diin siya nakakuha og 3,391 ka botos batok kang Mayor Democrito Diamante Jr. nga 1,915 ka botos.

Si Lagon nisang-at og election protest batok ni Diamante kinsa giproklamar nga mananaug sa May 9, 2016 nga eleksiyon sa labaw nga 46 ka botos.

Si Diamante nakakuha og 17,140 ka botos samtang kang Lagon 17,094 ka botos.

Si Provincial Election Supervisor, Atty. Lionel Marco Castillano, niingon nga ang desisyon sa RTC mahimo pa nga mapasaka sa labaw nga hukmanan.

Si Provincial Election Officer, Atty. Ferdinand Gujilde, nipasabot nga ang usa ka habig makaapelar pa ngadto sa division sa Commission on Elections.

Kung unsay desisyon sa Comelec Division, ang motion for reconsideration ipasaka ngadto sa Comelec En Banc.

Kung dili gihapon matagbaw, ang desisyon sa Comelec En Banc mapasaka pa ngadto sa Supreme Court pinaagi sa petition for certiorari hangtud mapagawas ang hingpit nga desisyon. (BANAT NEWS)