Suba bridge katunga pa nahuman
CEBU, Philippines – Anaa pa sa 60 porsiyento ang nahuman sa giayo nga Suba Bridge sa Lungsod sa Liloan nga maoy laing agianan paingon sa amihanang bahin sa Probinsiya sa Sugbo.
Kini ang nasayran ni Mayor Christina Garcia Frasco atol sa iyang binuwan nga pagpangunay sa pagsusi sa lugar sukad gisugdan ang proyekto sa Department of Public Works and Highways niadtong Pebrero 26, 2017. Apan matud ni Frasco nga nipasalig kaniya ang kontraktor nga Duros nga ilang mahuman ang proyekto sa ikatulong semana sa Oktubre imbis Disyembre ang anaa sa ilang kontrata.
Si Frasco nipasabot nga gipangunayan niya ang pagsusi sa proyekto aron pagpakita kung unsa ka mahinungdanon nga maagian dayon ang maong taytayan.
Paspas na unya ang pag-agi sa mga sakyanan gikan sa National Highway sa Tayud ug Catarman lahos sa Poblacion.
Ang kagamhanan sa Lungsod sa Liloan nipatuman og Traffic Management Plan aron maminusan ang problema sa trapiko samtang nag-ayo sa taytayan.
Matud ni Frasco nga maayo ang resulta sa ilang traffic plan tungod sab sa pagkooperar sa kadaghanan.
Gihimo ang paglimpyo sa daplin sa kadalanan gikan sa mga nag-ali nga nakadugang sa huot sa mga sakyanan.
Si Frasco nanawagan sa tanan nga motuman lang sa lagda sa balaud sa kadalanan kaysa magsige og reklamo alang sa kaayuhan sa tanan. (BANAT NEWS)
- Latest