Pito nadakpan sa drug bust
CEBU, Philippines – Ubay-ubay nga mga nalambigit sa ilegal nga drugas na usab ang nangadakpan sa gihimong managlahing mga operasyon sa kapolisan sa Sugbo.
Mokabat P118 mil nga balor sa shabu nasakmit atol sa gipahigayong buy-bust operation didto sa Sitio Sombria, Brgy. Lawaan 1, Dakbayan sa Talisay nga niresulta sa pagkasikop sa usa ka High Value Target sa kapolisan nga giila nga si Dendo Carcellar Cabanero alyas Jack-jack,34.
Walo ka gagmay nga pakete ug tulo ka medium nga pakete sa gidudahang shabu ang nasakmit gikan kaniya.
Samtang nadakpan usab ang bayot nga menor de edad nga tigpayuhot og ilegal nga drugas lakip ang upat ka durugista. Unang nasikop ang bayot nga menor de edad sa Barangay Tanke nga nakuhaan og 80 ka gagmay nga pakite sa shabu.
Nasikop sab sila si Manfred Tayco, 30 anyos; Ronnel Abapo, 31 anyos ug si Christopher Cabardo, 20, nga naagian nga nagduwa og video karera. Samtang sa Sitio Tagaytay, Brgy. Calero, Liloan nasikop ang usa ka gikatahong idlas nga pusher pinasikad sa buy-bust operation nga si Antonio Pilapil Garbo alyas “Tony Baho” 52. Nakuha gikan niini ang usa ka gamay ug usa ka dakong pakete sa gituohang shabu. Matud pa sa hepe sa Liloan police station nga si Senior Supt. Melbert Glade C. Esguerra nga kanhi drug surrenderer si Garbo apan nibalik kini sa pagpamaligya.
Samtang nadakpan usab sa Catmon Police Station ang usa ka Jann Larry Oriendo, 26, taga Barangay San Jose sa maong lungsod nga drug surrenderer apan nibalik sa drugas. -/EIM (BANAT NEWS)
- Latest