Magtutudlo unahon pag-drug test
CEBU, Philippines - Buot sa pangulo sa Cebu Provincial Anti-Drugs Abuse Office, Ivy Durano-Meca, nga unahon sa pagpaubos sa drug test ang mga magtutudlo una pa ang mga tinun-an.
Si Meca nipadayag sa iyang suporta sa lakang sa Department of Education nga ipaubos sa random drug test ang mga tinun-an sa high school.
“Of course mas mo-prefer gyud ko nga unahon nato og drug test ang mga teachers ug non-teaching staff sa mga schools prior to conducting random drug testing to students,” matud ni Meca.
Matud niya nga ang CPADAO makig-alayon sa Cebu Provincial Schools Division alang sa drug test sa mga magtutudlo.
Nahatagan na sab sila sa guidelines sa DepEd sa pag-drug test sa mga tinun-an diin ang maong ahensiya ang mopili sa mga eskwelahan nga himoong “sample school” kung asa ipahigayon ang drug test.
Apil sa guidelines ang pagseguro sa “confidentiality” sa resulta ilabi na kung may magpositibo kini aron paglikay nga mauwawan ang tinun-an ug ang mga ginikanan maoy unang pahibaw-on sa resulta.
Ang tinun-an ug ang ginikanan i-refer kini sa Department of Health accredited facility aron pagdeterminar sa dependency level sa tinun-an ug kun mapamatud-an nga drug dependent ang bata, i-refer kini sa Department of Social Welfare and Development alang sa counseling ug uban pang interventions.
Ang DepEd nagplano nga sugdan ang random drug test sa mga magtutudlo ug tinun-an sunod buwan. - /GMR) (BANAT NEWS)
- Latest
