Nanglungkab nasikop tungod sa CCTV

CEBU, Philippines - Nadakpan sa follow-up operation sa kapolisan sa Presinto 2 sa Mandaue City Police Office ang suspek sa pagpanglungkab sa buhatan sa gasolinahan sa Subangdaku diin nasakiyo ang P36,000 nga salapi, laptop ug uban pang mahalong butang.

Ang nadakpan alas 7 pasado sa niaging Biyernes sa gabii ang giila ni Police Officer 3 Arthur Cuyos nga si Joseph Dalaguete, 25, taga Panagdait, Mabolo, Dakbayan sa Sugbo.

Matud ni Cuyos nga ang pagpanglungkab nahitabo sa niaging kadlawon ug buntag na kini nadiskubrehan ni Francisco Rueras nga pump boy sa Phoenix Gasoline Station sa Subangdaku.

Dugang ni Cuyos nga dali nga nipadangat sa maong hitabo ang supervisor sa gasolinahan nga si Dante Suico, 32, taga Mabolo, Dakbayan sa Sugbo.

Si Cuyos niingon nga ang ilang operative dali nga naghimo og pakisusi sa maong insidente pinaagi sa pagtan-aw sa video footage sa close circuit television (CCTV) camera.

Sa hulagway nga nakuha maoy giila sa mga kawani ang maong suspek kinsa namatikdan nga magtambayan sa maong lugar hinungdan nga gihimo gilayon nila ang follow-up operation. - /GMR) (BANAT NEWS)