Mayor Diamante PDP-Laban na
CEBU, Philippines - Human sa usa ka tuig nga pagsuporta sa administrasyon ni Presidente Rodrigo Duterte, si Tuburan Mayor Democrito Diamante Jr. pormal na nga nitapon sa Partido Demokratiko Pilipino-Lakas ng Bayan (PDP-Laban).
Si Diamante kinsa presidente sa League of Municipalities of the Philippines (LMP)-Cebu Chapter ingon man sa Visayas Cluster niingon nga ang pagpahural nahitabo niadtong Agosto 1, 2017 sa Lubao, Pampanga.
Si Senate President Aquilino “Koko” Pimentel III, ang pangulo sa PDP-Laban, ug House Speaker Pantaleon Alvarez ang nipahural kang Diamante ug ubang mga opisyal.
Matud ni Diamante nga mayoriya sa mga pangulo sa LMP sa mga probinsiya ang nitapon na sa PDP-Laban.
Kini naglakip nilang LMP national president, Mayor Fe Brondial sa Oriental Mindoro; LMP-Southern Leyte president Oliver Ranque, LMP-Northern Samar president Don Abalon, ug uban pa.
“Maganda ang layunin at adbokasiya ng PDP-Laban. Ito’y isang partido na angkop sa mga mahirap na katulad ko,” matud ni Diamante.
Si Diamante ang hugot nga nagsuporta sa federalism advocacy ni Duterte pinaagi sa pagporma sa “Sugbuanong Federalismo.”
Siya sakop sa Liberal Party dihang nasublian sa pagkapili isip mayor niadtong Mayo 2016 nga eleksiyon apan kusganon siyang nanawagan sa mga mayor sa Probinsiya sa Sugbo nga suportahan ang administrasyon ni Duterte.
Gani si Diamante ang labing unang mayor sa probinsiya ug sa tibuok nasud nga nakaumol sa Alsa Droga nga gilangkuban sa mga residente sa Tuburan aron pagtabang kang Duterte sa giyera batok ilegal nga drugas. (BANAT NEWS)
- Latest
