Bag-ong building sa Pinamungajan DH gisubhan
CEBU, Philippines - Giinugurahan niadtong Martes ang bag-ong building sa Pinamungajan District Hospital nga gipangulohan ni Gobernador Hilario Davide III.
Matud ni Davide nga mas madasig pa ang mga empleyado sa maong tambalanan sa paghatag og serbisyo sa mga konstituwente karon nga aduna na silay bag-ong building.
“We are now preparing the budget for next year, atong padak-an gihapon ang allocation sa Provincial Health Office. Our priority is health and we should endeavor to give the best services to our constituents,” matud sa gobernador.
Sa maong building nga nagkantidad og P12 milyones ibutang ang emergency room, out-patient department, administrative office, dental clinic ug ingon man laboratory rooms sa x-ray, radiology ug ultrasound.
Si Davide nagkanayon nga padayon nga tinguha karon sa probinsiya ang pag-upgrade sa mga tambalanan ilabina ang upat ka provincial hospitals sa Dakbayan sa Carcar, Danao, Bogo ug Lungsod sa Balamban.
Kini aron dili na kinahanglan pa ibiyahe ang mga pasyente padulong sa Dakbayan sa Sugbo aron magpatambal.
Gawas sa bag-ong building, gipangulohan usab sa gobernador ang ribbon-cutting sa Tuberculosis-Directly Observed Treatment, Short Course ug Animal Bite Centers sa maong tambalanan. - /GMR) (BANAT NEWS)
- Latest