Apohan sa batang napagan gibanghagan sa taga TCDH?

CEBU, Philippines - Nagpangagot sa kalagot ang apohan sa batang napagan sa pinusilay human matud pa gisinghag-singhagan sila sa duha ka kawani sa Talisay City District Hospital sa dihang ilang gidala ang apo kanila.

Si Peresita Nebria, apuhan sa 12 anyos nga batang babaye nga naigo sa iyang tuo nga batiis atol sa engkwentro sa mga polis ug narco-cop nga napatay adtong higayona, nipasangil atubangan sa mga tigbalita nga dili niya malimtan ang panagway sa duha nga yano lang namanghag kaniya nga unta naa siya sa karatol tungod sa nahiaguman sa iyang apo.

Matud pa niya nga tungod sa iyang pagdali-dali wala gyud siya’y kwartang nadala. Sa pagpakwenta na sa iyang bayronon sa botika hayan nakahangyo siya sa duha ka kawani sa TCDH apan gibanghagan siya sa duha.

Miapelar siya niining mga kawani sa tambalanan nga dili singhagan ang mga tagtungod kay wala sila masuhito sa proseso ug labaw sa tanan wala nila gustoha nga adunay mahitabo sa ilang apo hinungdan sa iyang karatol.

“Lugpad na gud ang motor padung sa hospital unya wala tabanga dayun. Ang ako gikalagotan ang social worker nga maninghag sila nga unta ila lang hinayon kay naratol gud ta,” nagkanayon si Nebria.

Dugang pa ni Nebria nga andam siya nga moatubang adtong duha ka mga kawani nga iyang gipasabot aron kini sila maleksyon ug dili na buhaton sa ubang mga pasyente o tawo nga mangayo og tabang kay sila may gitahasan paglihok niini.

Gisuwayan sa pagkuha og habig ang maong tambalanan apan pulos naglikay motubag ug walay buot mohatag sa ilang habig bahin sa reklamo. - /IBM) (BANAT NEWS)