Retiradong elected officials sa mga barangay pahalipayan

CEBU, Philippines - Usa ka ordinansahon ang giduso diha sa konseho aron pahatagan og pahalipay kadtong mga opisyales sa barangay sa Siyudad sa Sugbo ang moretiro sa ilang serbisyo. Ubos sa gitanyag nga ordinansa ni Konsehal Raymond Alvin Garcia, ulian og tag P5,000 ang kada tuig nga serbisyo sa barangay kapitan samtang P3,000 ang kada tuig sa kada tuig nga serbisyo sa mga barangay kagawad. Matud ni Garcia nga walay laing benepisyo nga madawat ang mga opisyales sa barangay kondili ang honoraria gikan lang sa siyudad mao nga nakahunahuna siya niini. Gani, matud niya nga wala sab malakip ang mga opisyales sa barangay sa Government Service Insurance System. Sa pagkakaron, gi-refer ni Garcia iyang proposal ngadto sa committee on laws; committee on budget and finance; and Barangay Affairs Office para sa ilang komento ug rekomendasyon.

Kusganon kining gisuportahan ni Phillip Zafra, kinsa presidente sa Association of Barangay Councils, ang proposal ni Garcia.

“They have no GSIS, PhilHealth, PAG-IBIG, among others. And yet some of them has been in the services stay 20 to 40 years. Upon retirement of service, wala silay benefit nga madawat,” matud ni Zafra.

Ubos sa maong giduso nga ordinansahon, ang mga retiradong barangay elected officials angay nga mosumiter og written request ngadto sa opisina sa mayor nga adunay pangalan nila, posisyon nga ilang nahuptan, ug gidugayon nila sa maong posisyon.

Ang maong request kinahanglang adunay sertipikasyon gikan sa Department of the Interior and Local Government nga nagpamatuod sila nakaserbisyo isip elected officials sa barangay.

Ang mga nagretiro nga opisyales sa barangay nga gi-dismiss sa serbisyo ug gi-penaltihan og suspension dili makaapil sa maong benepisyo.

Ipaubos pa ang maong ordinansa sa public hearing usa isumiter alang sa final deliberation. - /IBM) (BANAT NEWS)