Angkas ug Uber gisuportahan sa konseho

CEBU, Philippines - Gisuportahan sa Konseho sa Siyudad sa Sugbo ang Angkas ug Uber Moto nga maoy bag-ong paagi sa transportasyon sa Sugbo.

Sa ilang regular session sa miaging Martes, gipasar sa Konseho ang resolusyon ni Konsehal Pastor Alcover, Jr. kinsa miingon nga mas barato ang pletehan sa Angkas ug Uber Moto kon itandi  sa ordinaryong habal-habal. Sa pagkakaron, adunay 100 ka mga rehistradong motor ubos sa Angkas samtang ang Uber Moto wala pa magsugod sa ilang operasyon.

Ang pag-aprubar niini gihimo bisan og miapela ang Land Transportation Franchising and Regulatory Board nga ipahunong ang operasyon sa Angkas, matud ni Alcover nga naandan na sa publiko nga adunay habal-habal sa kadalanan.

Ang Angkas ug Uber Moto mogamit og mobile application aron magpa-book ang mga pasahero kon asa sila kuhaon ug asa sila ihatod sa drayber.

Gani, matud ni Alcover nga mas safety ang Angkas ug Uber tungod adunay helmet, hairnet, ug face mask ang matag pasahero nga mosakay sa ilang mga motor. Dugang pa niya nga ang mga drayber sa Angkas gipaubos una sa skills assessment program, adunay background check, una sila gitugotan nga mamasahero sa kalsada.

Sigon ni Alcover nga nagkagrabe na ang trapik sa siyudad kini maoy rason kon nganong gidawat sa mga sumasakay ang Angkas isip matang sa transportasyon tungod mas dali sila maabot sa ilang trabaho ug eskuylahan.

Kahinumduman nga si LTFRB chairman Martin Delgra ang mipaluwat og statement nga ilegal ang Angkas tungod wala kini permit para mamasahero.

Apan una nang miingon si Mayor Tomas Osmeña nga suportahan sa siyudad ang maong operasyon tungod usa kini nga mitabang sa gobiyerno nga mosulbad sa problema sa transportasyon. - /IBM) (BANAT NEWS)