Duha ka sakop sa BJMP positibo sa drugas

CEBU, Philippines - Duha ka mga sakop sa Bureau of Jail Management and Penology 7 ang nagpositibo sa gipahigayon nga drug test karon tuiga matud pa ni Jail Chief Supt. Dennis Rocamora nga nahinabi sa Banat News.

Matud pa ni Rocamora, sulod sa pipila ka higayon na nilang gipaubos sa surprise ug random drug test ang 776 ka mga personnel sa BJMP 7 sa rehiyon  ug duha niini ang nagpositibo sa pagamit sa ginadili nga drugas.

Sumala pa ni Rocamora, ilaha pang ipaubos sa confirmatory test ang resulta ug kung mapamatud-an kini nga positibo gihapon ilaha kining pasakaan og kaso ug dako ang posibilidad nga mataktak gihapon kini sa serbisyo.

Dugang pa ni Rocamora, gipaubos pa sila karon sa imbestigasyon tungod kay maoy ilang tinguha nga walay mga jail officer nga malambigit sa ginadili nga drugas.

Giangkon ni Rocamora, karon lang tuiga, pito na ka mga sakop niya ang na-dismiss sa trabaho human kini napamatud-an nga sad-an gikan sa mga nagkadaiyang kaso, ug lakip niini ang pagpalusot og mga kontrabando diha sa mga prisohan.

Gitug-an ni Rocamora, gihimo na nila karong palisiya kung adunay mga mobisita sa mga priso nga masakpang mopalusot og mga kontrabando ilaha gayud kanselahon ang ilang prebilihiyo nga mabisita og mga kabanay. - /IBM) (BANAT NEWS)