Natokhang kaniadto napusilan patay

CEBU, Philippines - Usa ka lalaki nga gitokhang na sa nilabay nga tuig ug personal usab nga gihangyo sa Barangay Kapitan sa Bo. Luz ning Dakbayan sa Sugbo nga mohunong sa maong ilegal nga negosyo ang nakalas Biyernes sa gabii human kini nisukol sa mga operatiba sa Philippine Drug Enforcement Agency (PDEA-7) atol sa gipahigayon nga buy- bust operation sa Sitio Mabuhay, Barangay Luz ning Dakbayan sa Sugbo.

Ang nakalas naila nga si Eddie Apura, alyas Eddie Mala, usa ka street level target. Nakuha gikan kang Apura, ang upat ka paketeng shabu nga adunay timbang 5.06 gramos nga mobalor og P25,300, drug paraphernalia, kalibre .45 pistola nga adunay mga bala. Matud pa ni Leia Albiar, ang tigpamaba sa PDEA-7 nipahigayon og buy-bust ang ilang operatiba apan nisukol si Apura hinungdan nga kini napusilan patay.

Dugang pa ni Albiar, daghan na silang nadawat nga reklamo batok ni Apura sa maong lugar.

Gitug-an ni Albiar, adunay pipila ka tawo nga anaa duol sa lugar sa gipahigayonan og buy- bust ang gipugngan sa makadiyot kay gisusi sa mga operatiba sa PDEA kung unsay tuyo nila sa maong lugar. Si Apura, nakaangkon og duha ka samad pinusilan sa iyang kalawasan nga maoy naingnan sa hinanali nga kamatayon niini.

Sumala pa ni Kapitan Jerome Pagador sa Barangay Luz, sa nilabay nga tuig nagpahigayon sila og Joint Operation pinaagi sa Oplan Tokhang kauban ang Police Station 4 ug kapitan usab sa Mabolo sa paghangyo sa mga nalambigit sa ilegal nga drugas nga motahan na lang sa ilang kaugalingon.

Dugang pa ni Pagador, personal niyang gihangyo si Apura nga motahan ug moundang pagpamaligya og drugas nga nagsugod sa ginagmay hangtod nga nidaghan ang mga parokyano niini.

Gitug-an ni Pagador nga kasagaran sa mga kostumer niini mga call center agents ug mga construction workers.

Giawhag niya ang tanang mga nalambigit sa ilegal nga drugas diha sa iyang barangay nga matud niya ubay-ubay pa ang moundang na.

Samtang nadakpan ang giila nga High Value Target (HVT) ug number 3 sa top 10 drug pushers sa Lapu-Lapu  City Police Office (LLCPO) ug laing tulo pa niini ka mga kauban. Ang nadakpan alas-2 pasado ang takna sa miaging kaadlawon sa Marbeach sa Barangay Marigondon, Dakbayan sa Lapu-Lapu mao si Jose Vincent  Sentillas alyas Saddam nga ilang target ug mga kaubanan niini nga silang Elmer Aton Lawas, 28, Elvis Sumalinog Aton Jr., 28, uban sa 15 anyos nga batang lalaki.

Nasakmit sa kapolisan gikan niini ang 23 ka gagmay nga paketeng shabu ug P200 nga marked money.

Nadakpan usab ang pito ka tawo sa Barangay Cubacub, Dakbayan sa Mandaue dihang gipuntariya nila ang usa ka notadong drug pusher nga naila lang sa alyas nga “Madam” apan kini nakaeskapo.

Si Chief Inspector Mercy Villaro, tigpamaba sa Mandaue City Police Office (MCPO) miila sa mga nadakpan nga diha sa sulod sa panimalay sa nakaeskapo nga si Madam mao sila si  Ian Revales, 32, Judhel  Reyes, 21 ug Ruffa Marie Dy, 25.

Nakuha gikan kanila ang napulo ka medium size nga paketeng shabu ug duha ka gagmay nga pakete niini.

Samtang sa Presinto 2 nasikop usab silang Martin Labandero, 24, Lyndon Maglinte, 34, Hilt Batuigas, 47 ug Carlo Naparate, 20, diha  sa dalan Logarta sa Barangay Subangdaku  ug nakuhaan sila og tulo ka gagmay nga paketeng shabu ug usa ka linikit nga pinaugang dahon sa marijuana.

Sa Dakbayan sa Talisay, gidakop sa kapolisan ang kanhi nisurender nga drug pusher human kini nibalik og baligya og drugas diha sa sitio San Raphael, Barangay Tanke.

Ang dinakpan mao si Jhonereno Obrero, 22, nga nakuhaan og usa ka gamay ug usa ka medium nga paketeng shabu. - /EIM) (BANAT NEWS)