Cybersex den gironda

CEBU, Philippines - Naluwas sa hiniusang operasyon sa mga awtoridad ang duha ka minor de edad nga babaye  nga giingong gigamit sa online sexual exploitation ug nadakpan usab ang 20-anyos nga babayeng gipasanginlang maoy nagpasiugda niini diha sa sulod sa panimalay niini nga gihimong cybersex den.

Ang naluwas nga duha ka minor de edad nagpangidaron pa og 14 anyos samtang ang giingong nagbugaw kanila mao si Kristy Mae Arrisgado niadtong Biyernes alas-9 pasado ang takna sa buntag niadtong Biyernes sa Sitio Salvage, Barangay Looc, Dakbayan sa Lapu-Lapu.

Matud pa nga migamit og  smartphones sa pag-record sa video sa duha ka minor de edad nga naghilawas ang suspek ug ang makuha niining video footage ibaligya niini  ngadto sa mga langyaw pinaagi na sa internet.

Ang mga sakop gikan sa Women and Children’s Protection Desk sa Central Visayas, Department of Social Welfare and Development-7 kauban sa International Justice Mission (IJM) maoy naglangkob sa  entrapment operation nga gipahigayon.

Si Police Officer 3 Dante Auxtero sa Presinto 3 sa Lapu-Lapu City Police Office (LLCPO) miingon nga ang duha ka minor de edad  gikustodiya na sa DSWD 7 samtang  si Arrisgado gitanggong karon sa ilang detention cell.

Gikatakda siyang pasakaan og kaso karong Lunes nga naglakip sa kalapasan sa  Anti-Trafficking in Persons Act  ug ingon sa kalapasan ubos sa Anti-Child Pornography Act in relation to Cybercrime Prevention Act.  - /IBM) (BANAT NEWS)