Pagbaligya sa CICC pirmahan na

CEBU, Philippines - Gikatakda na ang pagpirmahay tali sa Kapitolyo ug sa Dakbayan sa Mandaue labot sa pagbaligya sa Cebu International Convention Center (CICC).

Matud ni Atty. Elaine Bathan, chief of staff ni Mandaue City Mayor Gabriel Luis “Luigi” Quisumbing, nga sa Agosto 22 ang pagpirmahanay sa mutual termination sa joint venture agreement tali sa Probinsiya sa Sugbo ug Dakbayan sa Mandaue ug ang pagpirma sa contract to sell sa CICC.

Ang Dakbayan sa Mandaue mohatag og pasiunang bayad ngadto sa Kapitolyo human sa pagpirma sa kasabotan apan gibutyag ni Bathan nga nauyonan karon nga duha ka hugna inay upat ang pagbayad.

Nauyonan nga ibaligya sa Probinsiya sa Sugbo ang CICC ngadto sa Mandaue sa kantidad nga P300 milyones.

Ang Kapitolyo ang nagpatukod sa CICC ug gigamit isip venue sa South East Asian Nation (ASEAN) Summit niadtong 2007 samtang ang Dakbayan sa Mandaue ang tag-iya sa luna. Sa pagkakaron matud ni Bathan nga wala pay plano ang kagamhanan sa dakbayan kung unsaon ang CICC.

 “There is nothing concrete as of now, the mayor and council is open for proposal as long as it is suitable on the desire of the mayor,” matud ni Bathan.

Si Bathan nibisita kagahapon sa Kapitolyo alang sa pakigtigum ni Provincial Administrator, Atty. Mark Tolentino, kabahin sa mga butang nga iya sa probinsiya nga anaa pa gihapon sa CICC sama sa stock sa Provincial Social Welfare and Development Office nga naglakip sa sinakong bugas, senina ug mga gamit sa relief operations.

Iyang gibutyag nga tinguah sa Kapitolyo nga mahuman ang target niini pagtukod og warehouse sa unang quarter sa tuig 2018 aron adto ibalhin ang mga butang nga anaa sa CICC.

“We also discussed with regards of the administration of the building, utilities and the security guards, so that we can put everything into order,” matud ni Bathan. (BANAT NEWS)