CHR mopadayon bahala’g pusilon

CEBU, Philippines - Commission on Human Rights 7 niklaro nga wala gayud mahitabo nga nibabag sila sa mga police operations ug pagpasaka og kaso tungod kay mopahigayon lamang sila og imbestigasyon human na man sa mga panghitabo.

Kini mao ang tubag ni Leo Villarino ang Chief Investigator sa CHR-7 nga nahinabi sa Banat News mahitungod sa pamahayag ni Presidente Rodrigo Duterte nga ipapusil ang mga sakop sa CHR kung magbabag-babag sa mga police operations o mopasaka og kaso ngadto sa mga otoridad nga nalambigit sa ilegal nga kalihukan

Matud pa ni Villarino, wala mahitabo nga nibabag sila sa mga police operation ug wala usab sila mopugong sa kapulisan nga mo-operate aron masikop ang mga nalambigit sa krimen ug durugista.

Sumala pa ni Villarino, wala sukad molapas ang CHR sa Presidential Decree 1829 (Obstruction of Justice).

Matud niya nga dili sila maoy nibabag sa imbestigasyon pagtino kon kinsay sad-an, dili usab sila maoy tigsalikway sa mga subpoena nga ilang gipadala ug dili usab sila maoy tighudlat sa mga testigos.

Giisip lamang ni Villarino nga ang pamahayag ni Duterte pagpadayag lang sa iyang gibati nga kasagmuyo ug nagpaabot sila nga adunay opisyal sa Malacañang nga mopasabot niini sa publiko.

Sa pagkakaron magpadayon sila sa ilang mandato subay sa mando sa Konstitusyon ug nadasig hinuon sila sa ilang trabaho karon nga adunay ingon niining pamahayag ang presidente aron ipakita sa publiko nga di angay magpadala sa landong sa kahadlok sa pagsubay sa katarong. (BANAT NEWS)