Pito ka BJMP personnel gitaktak
CEBU, Philippines - Pito ka mga sakop sa Bureau of Jail Management and Penology 7 ang nataktak sa serbisyo karong tuiga gumikan sa nagkadaiyang mga kaso matud pa ni Jail Chief Supt. Dennis Rocamora nga nahinabi sa Banat News.
Matud pa ni Rocamora, 150 ka mga personnel sa BJMP 7 tibuok Rehiyon 7 ang gipaubos nila sa imbestigasyon gumikan sa nagkadaiyang kaso lakip niini ang pakigkunsabo sa mga inmates aron mapalusot og mga kontrabando diha sa mga prisohan.
Sumala pa ni Rocamora, sa 150 nga napaubos sa imbestigasyon pito niini ang napamatud-ang sad-an hinungdan nga gitaktak na kini nila karon sa serbisyo karon tuiga.
Samtang padayon pa gitimbang-timbang ang lain nga mga nalambigit sa imbestigasyon apan siya mibahad nga dili sila mopabilin sa mga tawo nga naputos sa mga kontrobersiya diha sa ilang han-ay.
Giangkon ni Rocamora, aduna gayud silay kakuwangan sa mga personnel ug mga kagamitan hinungdan dili gayud nila malikayan nga adunay mga kontrabando nga makalusot sa prisohan.
Gitug-an ni Rocamora, mapasalamaton sila sa ubang mga Local Government Unit nga mihatag og ayuda sa ilang mga prisohan. (BANAT NEWS)
- Latest