Pulga nihimakak may gipaboran nga DLRO operator

CEBU, Philippines - Gihimakak ni Land Transportation Office-7 acting chief Alita Pulga nga may gipaboran siya nga grupo nga mo-operate sa Driver’s License Renewal Offices (DLROs) diha sa mga commercial centers sama sa malls.

Si Pulga sab niklaro nga ang pagbutang og DLROs sa malls wala na magkinahanglan og publication ug competitive bidding.

Kini isip tubag ni Pulga sa pakisusi sa mga LTO stakeholders sa Dakbayan sa Mandaue nga gipangulohan ni Dr. Danilo Dionson kabahin sa planong pagbutang og DLROs sa Robinsons Fuente Cebu, JCenter Mall sa Mandaue ug Island City Mall sa Tagbilaran City, Bohol.

Nangutana ang mga stakeholders kung mao ba gihapon nga grupo nga nag-operate karon sa mga DLRCs sa mall ang mo-operate sa bag-ong buhatan sa mga malls nga wala man lang sila konsultaha. Ang LTO niadtong panahon ni kanhi Assistant Secretary, Atty. Alfonso V. Tan, Jr., adunay Memorandum of Agreement tali sa Robinsons Land Corporation sukad Agosto 2015 sa paggahin og luna sa mga piniling Robinsons Malls alang sa DLRO.

Matud ni Pulga nga ang mga DLROs nasubay sa Department Order No. 2015-014 niadtong Pebrero 18, 2015, o ang Revised Guidelines on the Establishment of DLROs, diin commercial centers maoy mo-apply ngadto sa LTO alang sa pagbutang sa DLROs sa ilang lugar.

Ang application susihon sa LTO Central Office Committee on Transfer and Creation of LTO Offices kinsa morekomendar ngadto sa Secretary sa Department of Transportation.

Kung maaprobahan, usa ka MOA ang pirmahan tali sa  Assistant Secretary ug Regional Director sa LTO ug sa commercial center.

Gipasabot ni Pulga nga kini aron malikayan ang kontrata tali sa kwestiyonableng grupo ug tawo. Apan si Dionson ug kaubanan nangayo sa kopya sa maong mga dokumento ug nangutana kung nganong si Pulga lang ug Asec. Tan ang nasayud niini. (BANAT NEWS)