Hauling data sa DPS gikwestiyon

CEBU, Philippines - Gikwestiyon sa mga konsehal sa Dakbayan sa Sugbo nga sakop sa Barug Team Rama ang giingong ‘discrepancy’ sa hauling data sa Department of Public Services (DPS) ug Evo Enviro Solutions, Inc.

Kini human ang kanhi chairman sa committee on environment, Konsehal Joel Garganera, nakakuha og dokumento sa lahi nga billing gikan sa Pasajero Motor’s Corporation, ang service provider sa siyudad.

Matud pa ang EVO mao ang pribadong transfer station nga gikontrata sa Pamocor nga maoy gitahasan sa paghakot sa basura sa siyudad.

Base sa dokumento ni Garganera nga sulod sa 20 ka adlaw, dunay estimated difference nga P6.5 milyones gikan sa Hunyo 22 ngadto sa Hulyo 14.

Nakita kini sa record sa EVO ug sigun sa konsehal nga ang hauling record sa Pamocor giingong mas taas itandi sa service provider kaniadto sa siyudad.

Giingong sa Hunyo 22 lang, ang Pamocor nitala og dili mominus 785.29 tonelada sa basura samtang ang EVO naa lang sa 393.34.

Nadiskubre ni Garganera ang giingong discrepancy human nabantayan niini nga ang record sa EVO ug Pamocor managlahi.

Ang DPS niduso og billing report sa maong period human ang konseho sa siyudad nangayo niini.

Ang billing gibase na sa billing statement sa Pamocor.

Matud ni Konsehal Jose Daluz III nga ang record sa duha angayan nga magtakdo.

Matud sab ni Garganera nga dunay gross negligence sa hingtungdang buhatan sa pag-atiman niini human ang siyudad sa pagkakaron wala’y timbangan.

Tungod niini sigun sa konsehal nga ang siyudad dili maka-counter check sa billing sa Pamocor nga gibase lang sa waste manifestation nga giisyu sa pribadong landfill sa Consolacion.

Si Konsehal Margarita Osmeña sa BOPK nikwestiyon hinoon sa integridad ni Garganera kinsa sigun niini nga angayang klaruhon sa oposisyon ang data nga ilang nakuha sanglit wala’y ebidensiya nga gikan kini sa transfer station. (BANAT NEWS)