CHR moimbestigar sa kamatayon ni PO3 Quiamco

CEBU, Philippines - Mohimo og kinaugalingong imbestigasyon ang Commission on Human Rights sa kamatayon ni Police Officer 3 Ryan Quiamco, ang ginganlan ni Presidente Rodrigo Duterte nga nalambigit sa ilegal nga drugas, ug sa asawa niini nga si Rizalyn Quiamco.

Matud ni Leo Villarino, chief investigator sa CHR-7, duna silay direktiba gikan sa ulohang buhatan nga mohimo og imbestigasyon sa tanang giingong extra-judicial killings nga nahitabo atol sa operasyon sa kapolisan.

Dugang ni Villarino nga magpadala sila og subpoena sa buhatan ni Regional Intelligence Division-7 chief, Senior Supt. Jonathan Cabal, aron makapangayo sila og kopya may kalabutan sa ilang operasyon batok kang Quiamco.

Sumala pa ni Villarino nga gusto nilang masayran ang mga panghitabo sa wala pa namatay si Quiamco ilabi na nga nalakip ang asawa niini nga giingong mabdos ug gusto sab nila masayran kung kinsay mga nalambigit sa police operation.

Nagtuo si Villarino nga anaa sa Camp Crame si Quiamco ilabi na didto kini gipa-report ug wala sila nasayud nganong naa kini sa Sugbo.

Gibutyag ni Villarino nga wala na siya nahibulong kung nganong gilakip si Quiamco nga gitudlo ni Duterte nga nalambigit sa ginadiling drugas tungod kay nitunog usab ang pangan niini sa Lungsod sa Aloguinsan nga maoy tig-supply og drugas.

Napatay sa operasyon sa kapolisan ang magtiayong Quiamco niadtong Agosto 15 human giingong nisukol kini sa mga operatiba.

Samtang suportado niya ang kampanya batok sa ilegal nga drugas, si Cebu Archbishop Jose Palma sa iyang bahin nakapangutana kung ang pagpatay sa mga nalambigit niini mao ba ang pamaagi sa pagsulbad sa problema.

Gipasabot ni Palma nga ang kinabuhi usa ka bililhon maong iya gikasubo ang panghitabo. (BANAT NEWS)